रास्वपाको केन्द्रीय समिति बैठक बिहीबार, संसदीय दल नेता चयन मुख्य एजेन्डा

काठमाडौं । राष्ट्रिय स्वतन्त्र पार्टी (रास्वपा) ले चैत १२ गते बिहीबार अपराह्न ४ बजे केन्द्रीय समिति बैठक बोलाएको छ । बैठक पार्टीको केन्द्रीय कार्यालय चःमतिमा बस्ने तय भएको छ ।

पार्टीका प्रवक्ता मनिष झाले बैठकमा संसदीय दलको नेता चयन गर्ने विषयमा छलफल हुने जानकारी दिएका छन् । यससँगै पार्टीको विधानसम्बन्धी प्रावधानहरूबारे पनि विस्तृत छलफल गरिने जनाइएको छ ।

यसअघि नै रास्वपाले चुनावअघि वरिष्ठ नेता बालेन शाहलाई प्रधानमन्त्रीको उम्मेदवारका रूपमा अघि सारेको थियो । अब सोही सन्दर्भमा संसदीय दलको नेतृत्व चयन प्रक्रियाबारे निर्णय गर्न बैठक महत्वपूर्ण मानिएको छ ।

उता, संसद सचिवालयले नवनिर्वाचित सांसदहरूको पद तथा गोपनीयताको शपथ पनि सोही दिनका लागि तय गरेको छ । शपथलगत्तै बस्ने केन्द्रीय समिति बैठकमा विधान संशोधनको विषय समेत प्राथमिकतामा रहनेछ ।

हालको विधानको धारा ६६ (८) अनुसार, संसदीय दलको नेता चयनका लागि प्रत्यक्ष र समानुपातिकतर्फका उम्मेदवारहरूबीच निर्वाचन हुने र त्यसमा पार्टीका सबै साधारण सदस्यहरूले मतदान गर्न पाउने व्यवस्था छ । तर, उक्त व्यवस्था परिमार्जन गरी वरिष्ठ नेतालाई दलको नेता प्रस्ताव गर्ने तयारी भइरहेको नेताहरूले बताएका छन् ।

हालै सम्पन्न प्रतिनिधि सभा निर्वाचनमा रास्वपाले उल्लेखनीय सफलता हासिल गर्दै दुई तिहाइ नजिक मत प्राप्त गरेको थियो ।