काठमाडौंका केही क्षेत्रमा आज विद्युत् अवरोध हुने

काठमाडौं । नेपाल विद्युत् प्राधिकरणको बानेश्वर वितरण केन्द्रले आज काठमाडौंका विभिन्न स्थानमा केही समयका लागि विद्युत् आपूर्ति बन्द हुने जनाएको छ ।

प्राधिकरणले जारी गरेको सूचनाअनुसार गोठाटार फिडर अन्तर्गत पर्ने पेप्सीकोला र टाउन प्लानिङ क्षेत्रमा ११ केभी कम्पोजिट लाइन व्यवस्थापन तथा बुश कटिङ (झाडी सफाइ) कार्य गरिने भएकाले बिहान ११ बजेदेखि दिउँसो १ः३० बजेसम्म विद्युत् कटौती हुनेछ ।

त्यसैगरी, बत्तीसपुतली (चाबहिल सब–स्टेसन) तथा मिनभवन सब–स्टेसन अन्तर्गतका क्षेत्रमा पनि मर्मतसम्भारको काम गरिने छ । यस क्रममा मध्य बानेश्वर, पुरानो बानेश्वर, बत्तीसपुतली लगायतका क्षेत्रमा दिउँसो २ बजेदेखि ४ बजेसम्म विद्युत् आपूर्ति बन्द रहने जनाइएको छ ।

प्राधिकरणका अनुसार जीर्ण अवस्थामा रहेका पोल हटाउने तथा आवश्यक संरचना सुधार गर्ने काम गरिन लागिएको हो । निर्धारित समयभन्दा अघि काम सम्पन्न भएमा विद्युत् सेवा पनि छिट्टै सुचारु गरिने बताइएको छ ।

यसबाट पर्न सक्ने असुविधाप्रति बानेश्वर वितरण केन्द्रले उपभोक्तासँग क्षमायाचना समेत गरेको छ ।