नयाँ प्रणाली लागू गर्दै राहदानी विभाग, केही समय सेवा प्रभावित हुन सक्ने

काठमाडौं । राहदानी विभागले राहदानी सेवा व्यवस्थापनका लागि नयाँ प्रविधि आधारित प्रणाली लागू गर्ने तयारी गरेको छ । प्रणाली परिवर्तनको प्रक्रियाका कारण केही समय सेवा प्रभावित हुन सक्ने विभागले जनाएको छ ।

विभागले जारी गरेको सूचनामा हाल प्रयोग भइरहेको प्रणालीबाट नयाँ प्रणालीमा स्थानान्तरण (स्विच) हुने क्रममा राहदानी सेवा अस्थायी रूपमा अवरुद्ध हुन सक्ने उल्लेख गरिएको छ ।

विभागका अनुसार राहदानी खरिदका लागि नयाँ आपूर्तिकर्तासँग सम्झौता भइसकेको छ र अब नयाँ प्रणालीमार्फत राहदानी जारी गर्ने तयारी भइरहेको छ । आगामी एकदेखि दुई महिनाभित्र पुरानो प्रणाली हटाएर नयाँ प्रणाली सञ्चालनमा ल्याइने योजना रहेको बताइएको छ ।

प्रणाली परिवर्तनको चरणमा विभिन्न निकायबाट उपलब्ध गराइने राहदानी सेवा केही समयका लागि प्रभावित हुन सक्ने विभागले जनाएको छ । सूचनाअनुसार जिल्ला प्रशासन कार्यालय तथा विदेशस्थित नेपाली नियोगबाट प्रदान गरिने राहदानी सेवा एकदेखि दुई सातासम्म बन्द हुन सक्छ । त्यसैगरी राहदानी विभागबाट प्रदान गरिने सेवा पनि करिब एक सातासम्म प्रभावित हुन सक्ने जनाइएको छ ।

नयाँ प्रणाली पूर्ण रूपमा सञ्चालनमा आएपछि त्यसलाई स्थिर हुन एकदेखि तीन महिनासम्म लाग्न सक्ने विभागको भनाइ छ । यस अवधिमा राहदानी तयार भई सेवाग्राहीसम्म पुग्न सामान्यभन्दा बढी समय लाग्न सक्ने जनाइएको छ ।

विभागले आगामी छ महिनाभित्र राहदानी आवश्यक पर्ने नागरिकलाई सम्भव भएसम्म अन्तरिम अवस्था सुरु हुनुअघि नै सम्बन्धित जिल्ला प्रशासन कार्यालय, विदेशस्थित नेपाली नियोग वा विभागबाट सेवा लिन आग्रह गरेको छ ।

नयाँ प्रणाली लागू हुने मिति र सो अवधिमा गरिने व्यवस्थाबारे थप जानकारी पछि सार्वजनिक गरिने विभागले जनाएको छ ।