श्रम संस्कृति पार्टीलाई भोट दिन साम्पाङको आग्रह

धरान । हर्कराज साम्पाङ राईले प्रतिनिधिसभा निर्वाचनमा सुनसरी–१ बाट श्रम संस्कृति पार्टीका उम्मेदवारलाई भोट दिन आग्रह गरेका छन् । उनले सो पार्टीका उम्मेदवारलाई मत दिनु भनेको प्रधानमन्त्रीका उम्मेदवारलाई मत दिएको जत्तिकै महत्त्वपूर्ण हुने बताएका हुन् ।

धरान उपमहानगरपालिकाका मेयरसमेत रहेका साम्पाङले आफ्नो गृहनगरमा पहिलो पटक आयोजित चुनावी आमसभालाई सम्बोधन गर्दै यस्तो बताएका हुन् । धरानको भानुचोकमा आयोजित सभामा उनले श्रम संस्कृति पार्टीले देश बचाउने उद्देश्यसहित राजनीतिक यात्रा सुरु गरेको दाबी गरे ।

उनले हाल चर्चामा रहेको ‘जेनजी विद्रोह’को प्रसङ्ग उल्लेख गर्दै सिंहदरबार, सर्वोच्च अदालत र संसद भवनमा भएको आगजनी सामान्य विद्यार्थीहरूले गर्न नसक्ने भन्दै त्यसमा षड्यन्त्र भएको आरोप लगाए । देश संकटमा परेको अवस्थामा त्यसलाई जोगाउन आफू अघि बढेको उनको भनाइ थियो ।

साम्पाङले देशको अवस्था सुधार्ने लक्ष्यका साथ श्रम संस्कृति पार्टी स्थापना गरेर आफू अध्यक्ष बनेको बताए । उनले मतदातालाई आफू र पार्टीका उम्मेदवारलाई जिताउन अपिल गरे ।

उनले आफ्नो पार्टी कुनै विदेशी सहयोगमा नचलेको स्पष्ट गर्दै संघीयता, लोकतन्त्र, प्रत्यक्ष कार्यकारी प्रमुखको व्यवस्था, समानुपातिक तथा समावेशी प्रतिनिधित्वमा पार्टीको विश्वास रहेको बताए। साथै प्रकृति, संस्कृति र प्रविधिमा आधारित विकासको अवधारणालाई प्राथमिकता दिने उनको भनाइ थियो ।

युवा विदेशिने क्रम रोक्न शिक्षा प्रणालीमा परिवर्तन आवश्यक रहेको उल्लेख गर्दै उनले श्रम संस्कृति पार्टीको सरकार बने विद्यार्थीहरूलाई सातामा तीन दिन मात्रै विद्यालय जाने र बाँकी समय श्रम तथा उत्पादनसँग जोडिने शिक्षा दिने नीति लागू गर्ने बताए ।

यसैगरी उनले विदेशी हस्तक्षेपमुक्त देश बनाउने लक्ष्य लिएको र सीमाको सुरक्षाका लागि प्लस टु अध्ययनपछि अनिवार्य छ महिनाको सैनिक तालिमको व्यवस्था गर्ने योजना रहेको पनि बताएका छन् ।