नेपालले भारतलाई पेनाल्टी सुटआउटमा हरायो, अञ्जना राना नायक बनिन्

काठमाडौं । भारत र नेपालबीचको मैत्रीपूर्ण महिला फुटबल खेलमा नेपालले रोमाञ्चक जित हासिल गरेको छ । बुधबार भारतको सिक्किमस्थित पाल्जोर रंगशालामा सम्पन्न खेलमा पाहुना टिम नेपालले घरेलु टोली भारतलाई पेनाल्टी सुटआउटमा ३–० ले पराजित गरेको हो ।

नेपालका लागि खेलकी हिरो गोलकिपर अञ्जना राना रहिन् । उनले भारतका प्रिया दार्शीनी र अस्टम ओरामको पेनाल्टी रोक्दै नायकको भूमिका निभाइन् । भारतकी तेस्रो खेलाडीको प्रहार भने पोस्ट बाहिर गएपछि भारत एकपटक पनि गोल गर्न सकेन ।

नेपालबाट भएको चार पेनाल्टी प्रयासमध्ये निशा थोकर, सविता राना मगर, र रश्मीकुमारी घिसिङले गोल गरे । अनिता बस्नेतको प्रहार भने भारतकी गोलकिपर साउमिया नारायासमीले रोकिन् ।

यसअघि निर्धारित ९० मिनेटको खेल १–१ को बराबरीमा सकिएको थियो । खेलको ३०औं मिनेटमा भारतकी सौम्या गुगूल्टोहले गोल गर्दै घरेलु टोलीलाई अग्रता दिलाएकी थिइन् । तर पहिलो हाफको इन्जुरी समयमा नै नेपालकी रश्मीकुमारी घिसिङले गोल गर्दै टोलीलाई खेलमा फर्काइन् ।

यो नेपाल र भारतबीचको ‘अनअफिसियल’ मैत्रीपूर्ण फुटबल हो । यसअघि पनि नेपालले त्रिदेशीय मैत्रीपूर्ण प्रतियोगितामा भारतलाई २–१ ले पराजित गरेको थियो ।