जनकपुरबाट चुनावी अभियान थाल्दै कांग्रेस, ‘जिवित दस्तावेज’का रूपमा प्रतिज्ञापत्र सार्वजनिक गर्ने तयारी

काठकाडौं । नेपाली कांग्रेसले फागुन ६ गते मधेस प्रदेशको राजधानी जनकपुरधामबाट औपचारिक चुनावी अभियान सुरु गर्ने भएको छ । निर्वाचन आयोगले तय गरेको कार्यतालिका अनुसार फागुन ४ गतेदेखि देशव्यापी प्रचारप्रसार कार्यक्रम थालिने कांग्रेसले जनाएको छ ।

पार्टीका प्रवक्ता देवराज चालिसेका अनुसार फागुन ६ गते जनकपुरमा विशाल आमसभा आयोजना गरिनेछ । त्यसअघि फागुन ३ गते कांग्रेसले आफ्नो चुनावी घोषणा–पत्र सार्वजनिक गर्ने तयारी गरेको छ । ‘प्रतिज्ञापत्र’ नाम दिइएको उक्त दस्तावेजलाई पार्टीले यसपटक जनताले हरेक दिन सन्दर्भका रूपमा प्रयोग गर्न सक्ने “जिवित दस्तावेज” बनाइने दाबी गरेको छ ।

कांग्रेसले जनाएको अनुसार सभापति गगन थापा को नेतृत्वमा विस्तृत अध्ययन, अनुसन्धान र आन्तरिक विमर्शपछि प्रतिज्ञापत्र तयार गरिएको हो । यस दस्तावेजले देशको समृद्धिका प्राथमिकता, नागरिकका सुख–दुःख र विचारशील लोकतन्त्रका विविध आयाम समेटेर आगामी पाँच वर्षका लागि स्पष्ट मार्गचित्र प्रस्तुत गर्ने दाबी गरिएको छ ।

प्रवक्ता चालिसेले प्रतिज्ञापत्रका आधारमा आगामी कार्यकालको मूल्याङ्कन गर्ने पूर्ण अधिकार जनतासँग रहने उल्लेख गरेका छन् । पारदर्शिता, जवाफदेहिता र प्रभावकारी कार्यप्रवाहमार्फत लोकतन्त्रलाई जीवन्त र गतिशील बनाउने क्षमता कांग्रेससँग रहेको उनको भनाइ छ ।

यसैबीच कांग्रेसले चरम लोकप्रियतावाद अस्वीकार गर्ने स्पष्ट पारेको छ । पार्टीले सभ्य, सुसंस्कृत र सन्तुलित राजनीतिक शैलीलाई प्राथमिकता दिने बताउँदै आमसञ्चार तथा डिजिटल प्लेटफर्महरूमा पनि तर्क, विवेक र सम्मानलाई मार्गदर्शक बनाउने जनाएको छ ।

निर्वाचन आयोगको आचारसंहिताप्रति उच्च सम्मान व्यक्त गर्दै कांग्रेसले त्यसको कार्यान्वयनमा केही दल र तिनका समर्थकबाट भइरहेको उल्लंघनप्रति भने ध्यानाकर्षण गराएको जनाएको छ ।

पार्टीभित्र विशेष महाधिवेशनको पृष्ठभूमिलगायत विषयमा कुनै असमझदारी नरहेको स्पष्ट पार्दै कांग्रेसले निर्वाचनसँगै आन्तरिक एकता थप सुदृढ बन्दै गएको दाबी गरेको छ । निवर्तमान पदाधिकारी र वरिष्ठ नेताहरू क्षेत्रगत रूपमा खटिएर संगठन सुदृढीकरण तथा चुनावी तयारीमा सक्रिय रहेको विज्ञप्तिमा उल्लेख छ ।

विश्व परिवेशमा लोकतान्त्रिक मूल्य–मान्यतामाथि चुनौती बढिरहेको सन्दर्भ उल्लेख गर्दै कांग्रेसले छिमेकी राष्ट्रहरूका घटनाक्रमप्रति सचेत रहने तर आफ्नो प्रमुख ध्यान देश र नागरिकको हितमै केन्द्रित रहने स्पष्ट पारेको छ ।