सुनको मूल्य नयाँ उचाइमा, तोलामा ९,५०० रुपैयाँको वृद्धि

काठमाडौं । लगातार नयाँ कीर्तिमान बनाउँदै आएको सुनको मूल्य आज फेरि उल्लेख्य रूपमा बढेको छ । नेपाल सुनचाँदी व्यवसायी महासंघका अनुसार प्रतितोला ९ हजार ५ सय रुपैयाँले वृद्धि भई सुनको भाउ आज तोलाकै ३ लाख १८ हजार ८ सय रुपैयाँ पुगेको छ ।

यो मूल्य हालसम्मकै सबैभन्दा उच्च हो । पछिल्लो एक सातामा मात्र सुनको मूल्य तोलामा ३७ हजार रुपैयाँले बढेको महासंघले जनाएको छ ।

यसअघि मंगलबार सुनको भाउ तोलामा ३ सय रुपैयाँ बढेर ३ लाख ९ हजार ३ सय रुपैयाँ पुगेको थियो । सोमबार तोलामा ५ हजार २ सय रुपैयाँले बढेको सुनको मूल्य आइतबार २ हजार ४ सय र गएको शुक्रबार ९ हजार २ सय रुपैयाँले वृद्धि भएको थियो ।

गत साताको बुधबार एकैदिन १० हजार ४ सय रुपैयाँले उकालो लागेको सुनको भाउ बिहीबार भने तोलामा २ हजार ९ सय रुपैयाँ घटेको थियो ।

यता चाँदीको मूल्य पनि अहिलेसम्मकै उच्च विन्दुमा स्थिर रहेको छ । आज पनि चाँदीको भाउ तोलाको ६ हजार ८ सय ७० रुपैयाँमै कायम रहेको छ ।