ओखलढुङ्गामा प्रतिनिधि छनोट प्रक्रिया पुनः सुरु गर्न एमालेको निर्देशन

काठमान्डु । नेकपा एमाले केन्द्रीय कार्यालयले ओखलढुङ्गा जिल्ला कमिटीलाई पाँच दिनभित्र प्रतिनिधि निर्वाचन प्रक्रिया पुनः सुरु गर्न निर्देशन दिएको छ । मंसिर १६ मा जारी पत्रमार्फत केन्द्रीय संगठन विभाग प्रमुख काशीनाथ अधिकारीले सदरमुकाममा मात्र सम्पन्न गरिएको प्रतिनिधि छनोट प्रक्रिया स्वीकार्य नहुने स्पष्ट गरेका हुन् ।

पत्रमा उल्लेख भएअनुसार अपानी–१३ को निर्देशना विपरीत प्रतिनिधि छनोट गरिएको, आठमध्ये छवटा पालिका कमिटीहरूको आग्रह बेवास्ता गरिएको, धेरै इच्छुक उम्मेदवारको असहमति उठेको तथा प्रदेश कमिटी र केन्द्रीय संगठन विभागकै निर्देशन उल्लंघन भएकाले निर्वाचन प्रक्रिया बदर गरिएको छ ।

नयाँ निर्वाचनका लागि सबै आम सदस्यहरूलाई प्रभावकारी रूपमा जानकारी गराई प्रत्येक पालिकामा मतदान केन्द्र स्थापना गर्न तथा पाँच दिनभित्र प्रक्रिया पुनः सञ्चालन गर्न निर्देशन दिइएको छ । पुनः निर्वाचनलाई सहज बनाउन प्रदेश इञ्चार्ज शेरधन राईसहित केन्द्रीय नेताहरू विशाल भट्टराई, यज्ञराज सुनुवार र किशोर अधिकारीलाई समन्वयको जिम्मेवारी तोकिएको छ ।

गत शनिबार सम्पन्न प्रतिनिधि छनोटमा १,५१८ मत खसेका थिए । ईश्वर पोखरेल समूहले ‘क्लिन स्वीप’ गर्दै सबै १२ प्रतिनिधि जितेका थिए । खुलातर्फ अम्बिरबाबु गुरुङ, ज्ञानबहादुर खड्का, कमलप्रसाद न्यौपाने, अशोक थापा, राजीव कटवाल र केदारबाबु बस्नेत, महिलातर्फ इच्छाकुमारी गुरुङ, जुना विक, पशुपति गुरुङ र रमिला मगर श्रेष्ठ, युवातर्फ टिकराम धमला तथा दलिततर्फ ज्यानु कालिकोटे विजयी भएका थिए ।

जिल्लामा ७,१३५ मतदाता रहेकामा सदरमुकाममा मात्र राखिएको मतदान केन्द्रमार्फत १,५१८ जनाले सहभागिता जनाएका थिए । यही संरचनालाई लिएर कोसी प्रदेश कमिटीले पहिले नै अस्वीकारको संकेत दिँदै विवाद, निम्न उपस्थिती (१५ प्रतिशत पनि नपुगेको) र निर्देशन उल्लंघनका कारण परिणाम स्वीकार्य नहुने धारणा सार्वजनिक गरेको थियो ।