हर्क साम्पाङले निर्वाचन आयोगमा दल दर्ताका लागि निवेदन दिए

काठमाडौं । धरान उपमहानगरपालिकाका मेयर हर्कबहादुर साम्पाङले औपचारिक रूपमा आफ्नो राजनीतिक दल दर्ता गराउन निर्वाचन आयोगमा निवेदन दिएका छन् । आइतबार साम्पाङ नेतृत्वको टोलीले आयोगमा दर्ताका लागि निवेदन दर्ता गरेको आयोगका प्रवक्ता नारायणप्रसाद भट्टराईले पुष्टि गरेका छन् ।

प्रवक्ता भट्टराईका अनुसार निवेदनमा साम्पाङलाई संयोजक तोकिएको छ र दलको नाम ‘श्रम संस्कृति पार्टी’ उल्लेख गरिएको छ । उनले भने, “हर्कबहादुर राईलाई संयोजक राखेर दल दर्ताका लागि निवेदन आएको छ । आयोगको प्रक्रियाअनुसार निवेदनमाथि हाल जाँचबुझ भइरहेको अवस्था छ ।”

साम्पाङले स्वतन्त्र उम्मेदवारका रूपमा २०७९ को स्थानीय तह निर्वाचनमा विजयी हुँदै धरानको नेतृत्व सम्हालेका थिए । जनस्तरमा लोकप्रिय छविबाट पहिचान बनाएका साम्पाङले पछिल्लो समय संघीय राजनीति प्रवेशको संकेत गर्दै आएका थिए । उनले राष्ट्रिय स्तरमा श्रम, स्थानीय उत्पादन, संस्कृति संरक्षण र सुशासनको एजेन्डा अघि सार्दै दल निर्माणको तयारी गरेको बताएका छन् ।

दल दर्ताको प्रक्रिया सहजसँग अघि बढे आयोगले आवश्यक कागजात र मापदण्ड पूरा भएको प्रमाणित गरेपछि मात्र दर्ता निर्णय हुनेछ । अब आयोगको समीक्षा र छलफलपछि मात्र दलको आधिकारिक मान्यता पक्का हुनेछ ।

स्थानीय तह हुँदै राष्ट्रिय राजनीतिको केंद्रमा पाइला चाल्न लागेका साम्पाङको यो कदमले आगामी निर्वाचनमा स्वतन्त्र शक्ति र वैकल्पिक राजनीतिक मोर्चाको चर्चा फेरि ताजा बनाएको छ ।