महानिर्देशक प्रदीप अधिकारी भ्रष्टाचार आरोपमा अख्तियारको फन्दामा

काठमान्डु । नागरिक उड्डयन प्राधिकरणका महानिर्देशक प्रदीप अधिकारीलाई अख्तियार दुरुपयोग अनुसन्धान आयोगले पक्राउ गरी विशेष अदालतमा पेश गरेको छ । आयोगका एक अधिकृतका अनुसार अधिकारीविरुद्ध दर्ता गर्न लागिएको भ्रष्टाचार मुद्दासम्बन्धी अभियोगपत्रसहित उनलाई अदालतमा उपस्थित गराइएको हो ।

अख्तियारले अधिकारीमाथि दुरुपयोग र अनियमिततासम्बन्धी गम्भीर आरोप रहेको उल्लेख गर्दै आवश्यक कानुनी प्रक्रिया अघि बढाइएको जनाएको छ ।

यसअघि कात्तिक ३ गते सातदोबाटोबाट घरतर्फ जाँदै गरेका अधिकारीमाथि अपरिचित समूहले आक्रमण गरेको थियो । सो घटनामा संलग्न रहेको आरोपमा प्रहरीले काभ्रेका कोकिलबहादुर शाह, रामेछाप गेलुका ३१ वर्षीय सिर्जन अधिकारी तथा सर्लाहीका ३५ वर्षीय हेम तामाङलाई पक्राउ गरी अनुसन्धान गरेको थियो ।

अधिकारीविरुद्धको भ्रष्टाचार मुद्दा अब विशेष अदालतमा सुनुवाइ प्रक्रिया अघि बढ्नेछ ।