अर्थ मन्त्रालयमा रंगरोगन सुरु, सिंहदरबारभित्र पुनःनिर्माणको काम तीव्र

काठमाडौं । जेन–जी आन्दोलनका क्रममा क्षति पुगेको अर्थ मन्त्रालयमा रंगरोगनको काम सुरु भएको छ । आन्दोलनका क्रममा तोडफोड र आगजनीले भौतिक संरचनामा व्यापक क्षति पुगेपछि अहिले मन्त्रालय परिसरमा सरसफाईदेखि रंगरोगनसम्मका कार्य तीव्र बनेका छन् ।

भदौ २३ र २४ गतेको आन्दोलनले सिंहदरबारभित्रका प्रमुख सरकारी निकायलाई ठूलो असर पुर्‍याएको थियो । अर्थ मन्त्रालय मात्र नभई गृह, ऊर्जा जलस्रोत तथा सिँचाइ, शिक्षा, विज्ञान तथा सूचना प्रविधि मन्त्रालयसहित थुप्रै कार्यालयमा तोडफोड, ढुंगामुढा र आगजनी भएका थिए । मूल्यवान कागजात तथा सामग्री पनि क्षतिग्रस्त भएका कारण सरकारी कामकाजमा अवरोध भएको थियो ।

हाल अवस्था सामान्य बन्दै गएसँगै सरकारको पहलमा सरसफाई, मर्मत–सम्भार र पुनःनिर्माण कार्य अगाडि बढाइएको छ । मन्त्रालय परिसरमा नयाँ रंगरोगनको काम भइरहेको छ भने ढलेका भित्तापत्र र भत्किएका ढोकाझ्यालहरू पनि क्रमशः मर्मत भइरहेका छन् ।

सिंहदरबारभित्रैका अन्य मन्त्रालय र कार्यालयमा पनि सफाइ र मर्मतको काम समानान्तर रूपमा अगाडि बढाइएको छ । सम्बन्धित निकायका अधिकारीहरूले तोडफोडले बिगारेका संरचना छोटो समयमै पुनःनिर्माण गरेर नियमित प्रशासनिक सेवा अवरोध नहुने व्यवस्था गर्ने तयारी भइरहेको बताएका छन् ।