ओलीले प्रसाईंको रिहाइ माग्दै सरकारको कदममाथि प्रश्न गरे

काठमाडौं । नेकपा (एमाले) का अध्यक्ष केपी शर्मा ओलीले पक्राउ परेका व्यवसायी दुर्गा प्रसाईंको तत्काल रिहाइको माग गरेका छन् । पार्टी मुख्यालय, च्यासलमा बुधबार आयोजित उपत्यकाको स्थानीय तहका जनप्रतिनिधि भेलामा उनले प्रसाईंलाई केवल ‘बोलेको आधारमा’ पक्राउ गरिएको दाबी गर्दै यो कार्य मानवअधिकारविपरीत भएको आरोप लगाए ।

ओलीका अनुसार प्रसाईंले अभिव्यक्ति व्यक्त गरेको वा भिडियो सार्वजनिक गरेको भन्दै सरकारले ‘उत्तेजित’ ढंगले कदम चालेको छ, जुन स्वीकार्य नहुने उनले स्पष्ट पारे ।

“अभिव्यक्तिका कारण थुन्नु मानवअधिकार उल्लंघन हो भन्ने कुरा आयोगले पनि बताइसकेको छ । सरकारले यस्तो कदम चाल्ने अधिकार छैन,” ओलीले भने ।

उनले अपराध पुष्टि भएपछि मात्र कानुनी कारबाही सम्भव हुने जनाउँदै अभिव्यक्तिको आधारमा गरिएको गिरफ्तारी कानुनविपरीत रहेको टिप्पणी गरे ।