सन्तोष परियारले छाडे रास्वपा, ‘नयाँ जनमुखी अभियान’ सुरु गर्ने घोषणा

काठमाडौं । राष्ट्रिय स्वतन्त्र पार्टी (रास्वपा) का केन्द्रीय सदस्य र विघटित प्रतिनिधिसभामा प्रमुख सचेतक रहेका सन्तोष परियारले पार्टी परित्याग गरेका छन् । उनले कार्यवाहक सभापति डीपी अर्याल र महामन्त्री कविन्द्र बुर्लाकोटीलाई राजीनामा पत्र बुझाउँदै अब ‘स्वतन्त्र र जनमुखी नयाँ अभियान’ सुरु गर्ने घोषणा गरेका हुन् ।

राजीनामा पत्रमा परियारले लगातार पार्टीभित्र विचारको बहस गरे पनि त्यसलाई संस्थागत गर्न नसकेकोतर्फ संकेत गर्दै गहिरो निराशा व्यक्त गरेका छन् । उनले लेखेका छन्, “नेपाली समाजको विशिष्टता र चरित्रअनुसारको पार्टी विचार निर्माण गर्न नसकिएकोमा पनि म दुखी छु ।”

भदौ २३ र २४ गते भएको ‘Gen-G पुस्ताको विद्रोह’ नेपाली राजनीतिको परम्परागत ढाँचामाथि निर्णायक चुनौती बनेको उल्लेख गर्दै परियारले उक्त आन्दोलनले पुरानो राजनीतिक संरचना अब सक्षम नभएको स्पष्ट पारेको बताए । उनका अनुसार जेनजी पुस्ताको विद्रोहले समकालीन चेतना निर्माणमा महत्वपूर्ण प्रभाव पारेको छ ।

उनले अगाडि लेखेका छन्, “नेपाली राजनीतिक आन्दोलनको पुनर्संरचना, अवधारणाहरूको पुनपरिभाषा र संगठनहरूको पुनर्गठन गर्ने ऐतिहासिक जिम्मेवारी हाम्रो पुस्तामा आएको छ ।”

बदलिँदो राजनीतिक परिस्थितिलाई आत्मसात् गर्दै आफू अब फरक धारणाका नयाँ राजनीतिक यात्रामा लाग्ने बताउँदै उनले कार्तिक २८ गतेदेखि रास्वपाको कुनै जिम्मेवारी तथा सामान्य सदस्यता समेत नरहने घोषणा गरेका छन् ।