निर्वाचन आयोगद्वारा दल दर्ता आह्वान, मंसिरबाट प्रक्रिया सुरु

काठमाडौं । आगामी फागुन २१ गते हुने प्रतिनिधि सभा सदस्य निर्वाचन र माघ ११ गते तय भएको राष्ट्रिय सभा सदस्य निर्वाचनलाई लक्षित गर्दै निर्वाचन आयोगले सबै राजनीतिक दललाई दल दर्ता प्रक्रिया सुरु गर्न औपचारिक आह्वान गरेको छ ।

शुक्रबार आयोगले दुवै निर्वाचनका लागि छुट्टाछुट्टै सूचना सार्वजनिक गर्दै तोकिएको समयसीमाभित्र दल दर्ताका लागि आवश्यक कागजातसहित निवेदन दिन राजनीतिक दलहरूलाई अनुरोध गरेको हो । आयोगका अनुसार प्रतिनिधि सभा निर्वाचनका लागि मंसिर १ देखि १० गतेसम्म दल दर्ता प्रक्रिया चल्नेछ भने राष्ट्रिय सभा निर्वाचनका लागि मंसिर १ देखि ७ गतेसम्म समय तोकिएको छ ।

आयोगले दल दर्ताका लागि बुझाइने निवेदनमा दलको नाम, आयोगमा दल दर्ता भएको मिति, दलका पदाधिकारीहरूको विवरण, विधान, आर्थिक लेखापरीक्षण विवरणलगायत आवश्यक कागजात अनिवार्यरूपमा खुलाउनुपर्ने जनाएको छ । दल दर्ता पूर्ण नभएका वा कागजात अपुरो रहने दलहरूको निवेदन स्वीकृत नहुने आयोगले स्पष्ट पारेको छ ।

राष्ट्रिय सभाका एक तिहाइ सदस्यको कार्यकाल फागुन २० गतेबाट समाप्त हुँदैछ । रिक्त हुन लागेका ती स्थान पूर्ति गर्न माघ ११ गते निर्वाचन आयोजना गर्न लागिएको आयोगले जनाएको छ । यसअघि आयोगले निर्वाचन तयारी तीव्र बनाउँदै निर्वाचन क्षेत्र निर्धारण, मतदाता नामावली अद्यावधिक तथा निर्वाचन सामग्री व्यवस्थापनसमेत अघि बढाइसकेको छ ।

राजनीतिक दलहरू अहिले आन्तरिक तयारीमा जुटिरहेका छन् । नयाँ दल दर्ता गर्न चाहने समूहहरू पनि सक्रिय छन् । आगामी निर्वाचनले राजनीतिक प्रतिस्पर्धालाई कस्तो मोड दिने हो भन्नेबारे राजनीतिक विश्लेषकहरूबीच चर्चा चलिरहेको छ । आयोगले भने सबै राजनीतिक दलको सक्रिय सहभागिताले आगामी दुवै निर्वाचन सफल र विश्वसनीय हुने विश्वास व्यक्त गरेको छ ।