नवनियुक्त आईजीपी कार्कीले सम्हाले कमाण्ड, गृह मन्त्रालयमा दर्ज्यानी चिह्न प्रदान

काठमाडौं । दानबहादुर कार्की औपचारिक रूपमा नेपाल प्रहरीको ३०औँ महानिरीक्षक (आईजीपी) बनेका छन् । गृह मन्त्रालयमा आयोजित विशेष कार्यक्रममा सचिव रामेश्वर दंगालले उनलाई आईजीपीको दर्ज्यानी चिह्न लगाइदिए ।

प्रहरी नियमावलीअनुसार ३० वर्षे सेवा अवधि पूरा भएपछि अघिल्ला आईजीपी चन्द्रकुवेर खापुङ २६ कात्तिक राति १२ बजेबाट अनिवार्य अवकाशमा गएका थिए । त्यससँगै नेपाल प्रहरीको कमाण्ड आईजीपी कार्कीको मातहत आएको हो ।

मन्त्रिपरिषद्को कात्तिक २५ गतेको बैठकले कार्कीलाई नेपाल प्रहरीको सर्वोच्च पदमा नियुक्त गरेको थियो ।

२४ भदौमा जेनजी आन्दोलनको समयमा कार्कीले काठमाडौं उपत्यकाको कमाण्ड सम्हालेका थिए, जब २३ भदौमा उपत्यका एआईजीविहीन थियो । त्यसअघि उनी प्रहरी प्रधान कार्यालयको मानव स्रोत साधन विभाग प्रमुख थिए ।

डीआईजी पदमा रहँदा उनले लुम्बिनी प्रदेश प्रहरी कार्यालयको नेतृत्व गरेका थिए भने एसएसपीका रूपमा काठमाडौं प्रहरी परिसरको कमाण्ड सम्हाल्दा भुटानी शरणार्थी प्रकरणको अनुसन्धान चलिरहेको थियो ।

फिल्ड अनुभव र प्रशासनिक दक्षताका कारण इमानदार र अनुशासित प्रहरी अधिकृतका रूपमा परिचित कार्कीलाई संगठनभित्र जिम्मेवार र निष्पक्ष नेताको रूपमा हेरिन्छ ।

विदेशी तालिम र प्रवक्ता अनुभवसमेत बोकेका कार्की अब संगठन सुधार र व्यावसायिक क्षमताको सुदृढीकरणमा केन्द्रित हुने अपेक्षा गरिएको छ ।