प्रकृति संरक्षणमा योगदानको कदर, नेपाली सेना विश्व वन्यजन्तु कोषबाट सम्मानित

काठमाडौं । प्रकृति तथा पर्यावरण संरक्षणमा लामो समयदेखि पुर्‍याउँदै आएको योगदानको सम्मानस्वरूप नेपाली सेना विश्व वन्यजन्तु कोष नेपालबाट विशेष रूपमा सम्मानित भएको छ ।

विश्व वन्यजन्तु कोष नेपालको ३३औँ स्थापना दिवसका अवसरमा मंगलबार आयोजित कार्यक्रममा सेनालाई उक्त सम्मान प्रदान गरिएको हो । नेपाली सेनाका अनुसार करिब पाँच दशकदेखि राष्ट्रिय निकुञ्ज तथा वन्यजन्तु संरक्षण क्षेत्रमा निर्वाह गरेको भूमिकाको कदर गर्दै सम्मान गरिएको हो ।

यसअघि पनि शून्य सिकार वर्ष मनाउन सफल भएका कारण सन् २०११, २०१३, २०१५, २०१६, २०१८ र २०१९ मा सेनाका विभिन्न छ युनिट ‘अब्राहम कन्जर्भेसन अवार्ड’बाट सम्मानित भइसकेका छन् । बर्दिया राष्ट्रिय निकुञ्जले समेत यसअघि ‘डबल टाइगर अवार्ड’ प्राप्त गरिसकेको छ ।

नेपाली सेना विसं २०३२ सालदेखि राष्ट्रिय निकुञ्ज सुरक्षामा औपचारिक रूपमा परिचालित हुँदै आएको छ । हाल सेना १२ राष्ट्रिय निकुञ्ज, एक वन्यजन्तु आरक्ष र एक सिकार आरक्षको संरक्षणमा खटिएको छ । यसका लागि आठ गण, सात अनाश्रित गुल्म तथा एक प्रकृति संरक्षण शिक्षालय परिचालनमा रहेका छन् ।

सेनाले जनाएअनुसार संरक्षण अभियानकै सकारात्मक प्रभावस्वरूप सन् २००९ मा १२१ रहेको पाटे बाघको संख्या बढेर हाल ३५५ पुगेको छ भने सन् २००५ मा ४०० रहेको एकसिङ्गे गैँडाको संख्या बढेर ७५२ पुगेको छ ।

कठिन भौगोलिक अवस्था, प्रतिकूल मौसम र चुनौतीपूर्ण परिस्थितिका बीच पनि नेपाली सेनाले संरक्षणको जिम्मेवारी प्रभावकारी रूपमा निभाउँदै आएको जनाएको छ । यस क्रममा हालसम्म ११६ जना सैनिकले ज्यान गुमाइसकेको सेनाले उल्लेख गरेको छ ।