प्राविधिक शिक्षा परिषद्लाई मन्त्री पुनको चारबुँदे निर्देशन

काठमाडौं । शिक्षा, विज्ञान तथा प्रविधि मन्त्री महावीर पुनले प्राविधिक शिक्षा तथा व्यावसायिक तालिम परिषद् (सिटिइभिटी)लाई तत्काल कार्यान्वयन गर्नुपर्ने चारबुँदे निर्देशन दिएका छन् ।

परिषद्का अध्यक्षसमेत रहेका मन्त्री पुनले मौजुदा पाठ्यक्रमलाई सुधार गरी नवप्रवर्तनलाई समेट्ने खाका असोज मसान्तभित्र पेस गर्न निर्देशन दिएका छन् ।

त्यस्तै, एकीकृत शैक्षिक क्यालेन्डर बनाउने, परीक्षाको नतिजा तीन महिनाभित्र अनिवार्य रूपमा प्रकाशन गर्ने व्यवस्था मिलाउने, साथै विद्यार्थी–अभिभावक–शिक्षकको गुनासो सुन्ने र अभिलेख राख्ने छुट्टै शाखा तुरुन्त सञ्चालनमा ल्याउनुपर्ने बताइएको छ ।

यसबाहेक, २०६९ सालदेखि प्राप्त भएका सबै सम्बन्धनका आवेदन छानबिन गरी असोज मसान्तभित्र प्रतिवेदन पेश गर्न र सम्बन्धन दिने–नदिने निर्णय तुरुन्त लिन पनि मन्त्री पुनले निर्देशन दिएका छन् ।