प्रचण्डको अपिलः ‘मतदाता नामावलीमा नाम दर्ता गरौं’

काठमाडौं । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले आगामी फागुन २१ गते हुने प्रतिनिधि सभा सदस्य निर्वाचनका लागि सबै योग्य नागरिकलाई मतदाता नामावलीमा नाम दर्ता गर्न आग्रह गरेका छन् ।

बुधबार जारी भिडियो सन्देशमार्फत उनले नागरिकलाई नाम दर्ता प्रक्रियामा सक्रिय सहभागिता जनाउन आह्वान गर्दै त्यसका पाँच चरणबारे जानकारी पनि दिएका छन् ।

उनका अनुसार, मतदाता नाम दर्ताका लागि नेपाली नागरिकताको प्रमाणपत्र अनिवार्य रूपमा लिएर जिल्ला निर्वाचन कार्यालय वा आयोगले तोकेको नामावली दर्ता केन्द्रमा पुग्नुपर्छ । यदि नागरिकताको प्रमाणपत्रमा उल्लेखित ठेगानाभन्दा फरक ठाउँमा स्थायी बसोबास गरेको छ भने बसाइँसराइ प्रमाणपत्र वा विवाह दर्ता प्रमाणपत्र पनि पेस गर्नुपर्नेछ ।

नाम, उमेर वा ठेगाना नागरिकताबाट पुष्टि नहुने अवस्थामामा जग्गाधनी प्रमाणपुर्जा, शैक्षिक प्रमाणपत्र, राहदानी वा सवारी चालक अनुमतिपत्र जस्ता कागजात पेस गर्न सकिने बताइएको छ । आवश्यक परे सम्बन्धित वडाको सिफारिस पनि लिन सकिनेछ ।

प्रचण्डले भने, “लोकतान्त्रिक अधिकार सुनिश्चित गर्नका लागि प्रत्येक नागरिकको मताधिकार प्रयोग गर्न आवश्यक तयारी यहीबाट सुरु हुन्छ । त्यसैले सबैले नाम दर्ता गरौं ।”

उनले मतदाता नामावली भर्ने फारम पूरा गरी तोकिएको स्थानमा फोटो खिचाउन, औँलाका छाप दिन र दर्ता सम्पन्न भएपछि प्राप्त अर्धकट्टी सुरक्षित राख्न पनि आग्रह गरेका छन् ।

निर्वाचन आयोगका प्रवक्ता नारायणप्रसाद भट्टराईका अनुसार देशभर मतदाता नामावली संकलन यही कात्तिक ३० गतेसम्म मात्र जारी रहनेछ ।

आयोगले फागुन २० गतेसम्म १८ वर्ष उमेर पूरा गर्ने र नागरिकताको प्रमाणपत्र प्राप्त गरेका सबै नेपालीलाई सो म्यादभित्र नाम दर्ता गर्न औपचारिक अनुरोध गरेको छ ।