भिजिट भिसा अब सहजः अध्यागमन विभागले ल्यायो लचिलो व्यवस्था

काठमाडौं । अध्यागमन विभागले भिजिट भिसा प्रक्रियामा नयाँ र लचिलो प्रावधान लागू गरेको छ । यही कात्तिक १३ गतेको मन्त्रीस्तरीय निर्णयअनुसार विभागले नयाँ व्यवस्था आजदेखि कार्यान्वयनमा ल्याएको हो ।

यससँगै २०८० माघ १० देखि लागू रहेको पुरानो छ बुँदे मापदण्ड खारेज भएको विभागले जनाएको छ । विभागका अनुसार नयाँ प्रणालीले भिजिट भिसा प्रक्रियालाई सरल, स्पष्ट र नागरिकमैत्री बनाउने लक्ष्य राखेको छ ।

नयाँ व्यवस्थाअनुसार अब भिजिट भिसामा विदेश जान चाहने नेपालीले चार प्रमुख कागजात पेश गर्नुपर्नेछ ।

नयाँ व्यवस्थाअनुसार आवश्यक कागजात
१. कम्तीमा ६ महिना वैध अवधि भएको राहदानी ।
२. सम्बन्धित देशको प्रवेशाज्ञा (भिसा) — अन–अराइभल भिसा प्राप्त हुने मुलुकका हकमा प्रवेशाज्ञा आवश्यक नहुने ।
३. गन्तव्यसम्मको हवाइ टिकट ।
४. स्वघोषणा पत्र, जसमा व्यक्तिले भ्रमणको उद्देश्य, त्यसका लागि आवश्यक कागजात भएको र भ्रमणबाट सिर्जित परिणामप्रति स्वयं जिम्मेवार हुने व्यहोरा उल्लेख गर्नुपर्नेछ ।

विभागले नागरिकहरूलाई कुनै पनि बिचौलियाको प्रभावमा नपरी आफ्नो गन्तव्य, यात्रा उद्देश्य र आवश्यक कागजातका बारेमा पूर्ण रूपमा सुसूचित भई यात्रा गर्न अनुरोध गरेको छ ।

नयाँ प्रावधानले भिजिट भिसा लिनुपर्ने प्रक्रिया छोट्याएको र यात्रुहरूलाई थप सहज र जिम्मेवार बनाउने अपेक्षा गरिएको विभागको भनाइ छ ।