नख्खु कारागार खालीः जेनजीको प्रदर्शनपछि सबै कैदी मुक्त

काठमाडौं । जेनजी पुस्ताद्वारा सञ्चालित उग्र प्रदर्शनको परिणामस्वरूप ललितपुरको नख्खु कारागारमा रहेका सबै कैदीहरू बाहिर निस्केका छन् ।

रास्वपाका सभापति रवि लामिछानेसहितका कैदीहरू प्रदर्शन उग्र भएपछि कारागार छाड्न सफल भएका हुन् ।

प्रदर्शनकारीहरू कारागार परिसरमा पुगेसँगै प्रशासन असहाय बनेको र नियन्त्रण गुमाएको बताइएको छ । सोही क्षणको फाइदा उठाउँदै सम्पूर्ण कैदीहरू निस्किएको ललितपुरका एसएसपी श्यामकृष्ण अधिकारीले पुष्टि गरेका छन् । उनका अनुसार अहिले कारागार पूर्णरूपमा खाली छ ।

यसअघि सोमबार र मंगलबार भएको प्रदर्शन हिंसात्मक रूप लिँदा स्थिति नियन्त्रण बाहिर गएको थियो । जेनजी आन्दोलनले भयावह मोड लिँदा २० जनाभन्दा बढीको मृत्यु भएको छ भने राष्ट्रपति, प्रधानमन्त्री तथा अन्य उच्च सरकारी कार्यालयमा आगजनी भएको छ । धेरै संरचना ध्वस्त भएका छन् ।

घटनाक्रम तीव्र रूपमा विकसित भइरहेका बेला प्रधानमन्त्री केपी शर्मा ओलीले पदबाट राजीनामा दिइसकेका छन् ।