प्रशासनले तेन्जिङ लामाको नागरिकताको विवरण फेला पार्न सकेन

काठमाडौं । जेनजी आन्दोलनका क्रममा ‘टीओबी’ लेखिएको टी–सर्ट लगाएर पेस्तोलसहित देखिएका तेन्जिङ दावा लामाको नागरिकता स्थिर छैन भन्ने पुष्टि गर्दै जिल्ला प्रशासन कार्यालय काठमाडौंले प्रहरीलाई जवाफ पठाएको छ । जिल्ला प्रहरी परिसरले २०७९ असार २४ मा नागरिकता लिएको भनिएको तेन्जिङबारे सोध्दा प्रशासनले सम्बन्धित फाइल नै फेला नपरेको जानकारी दिएको हो ।

प्रमुख जिल्ला अधिकारी ईश्वरराज पौडेलका अनुसार सोही आन्दोलनका बेला प्रशासन कार्यालयमा आगजनी हुँदा केही अभिलेख जलेका थिए र तेन्जिङसम्बन्धी कागजात फेला परेनन् । यही जवाफ प्रहरीलाई पठाइएको पौडेलले बताए ।

असोज २६ मा पक्राउ परेका तेन्जिङको जन्म दर्ता भने काठमाडौं महानगरपालिका–६ बौद्धमा भएको सार्वजनिक अभिलेख देखिन्छ, तर त्यो मिति २०६३ चैत १० शनिबार परेको कारणले प्रक्रिया वैधानिकताबारे प्रश्न उठेको छ । यही विषय यकिन गर्न जिल्ला प्रहरी परिसरका एसएसपी रमेश थापाले वडा कार्यालयलाई पत्राचार गरिएको बताए ।

वडा नम्बर ६ का अध्यक्ष भुवन लामाले २०६४ सालपछि मात्र वडामा जन्म दर्ता थालिएको बताउँदै पुराना अभिलेख महानगरपालिकाको नगर कार्यपालिकामा हुने जानकारी दिएका छन् । नागरिकताको सिफारिससमेत वडामा नपाएको उनले बताए ।

भदौ २३ र २४ को आन्दोलनमा ‘टीओबी’ लेखिएको ज्याकेट र बुलेट बाइक चढेका युवासँग उनी देखिएका भिडियो सार्वजनिक भएका छन् । ‘टीओबी’को अर्थ ‘तिब्बतियन ओरिजनल ब्लड’ भन्ने बताइन्छ ।

उनको घरबाट बरामद गरिएको पेस्तोल नक्कली भएको प्रहरीले पुष्टि गरेको छ । बुबा बितेको र आमा भारतको कुशीनगरमा बस्ने गरेको तेन्जिङले बयान दिएका छन्, तर उनले भनेको बहिनीसमेत सम्पर्कमा ल्याउन नसकिएको प्रहरीले जनाएको छ । उनका कुनै पारिवारिक सदस्यसमेत अहिलेसम्म सम्पर्कमा आएका छैनन् ।

‘उहाँको पहिचान नै प्रष्ट छैन,’ जिल्ला प्रहरी परिसर काठमाडौंका एसपी पवन भट्टराईले भने, ‘परिवारका कसैसँग पनि सम्पर्क भएको छैन ।’

तेन्जिङले आफूहरू ‘टिओबी बाइकर्स’ समूहका भएको र तिब्बतियन मूलका नेपाली भएको जनाएका छन् । ‘म आधा तिब्बतियन हुँ,’ उनको प्रहरी बयान उद्धृत गर्दै अनुसन्धान अधिकृतहरूले बताएका छन् ।

अहिले उनलाई अभद्र व्यवहारसम्बन्धी कसुरमा म्याद थप गरी अनुसन्धान भइरहेको छ । बरामद नागरिकता प्रमाणपत्रमा रहेको हस्ताक्षरसमेत फरेन्सिक परीक्षणका लागि पठाइने तयारी भइरहेको प्रहरीले जनाएको छ ।