गाजामा जीवित बन्धकको सूचीमा नेपाली विद्यार्थी विपिन जोशी

काठमाडौं । हमासको नियन्त्रणमा रहेका जीवित बन्धकहरूको नयाँ सूची सार्वजनिक हुँदैगर्दा नेपाली युवक विपिन जोशीको नाम पनि त्यसमा समावेश भएको पुष्टि भएको छ । इजरायल–हमास युद्धविराम समझदारीको पहिलो चरणअन्तर्गत बन्धकहरू रिहा हुनुअघि सार्वजनिक गरिएको सूचीकै माध्यमबाट विपिनको अवस्थाबारे जानकारी बाहिर आएको हो ।

अन्तर्राष्ट्रिय पत्रिका वाशिङ्टन पोस्टले सार्वजनिक गरेको सूचीमा विपिन जोशीलाई जीवित बन्धकका रूपमा उल्लेख गरिएको छ । यसअघि सीएनएनले उनको अवस्थालाई ‘अज्ञात’ भनेको थियो । तर पछिल्लो सूची टाइम्स अफ इजरायल, एपी लगायतका अन्य सञ्चारमाध्यमले पनि प्रकाशित गरेका छन् ।

यो सूचीमा रहेका सबैजना पुरुष हुन् र उनीहरूमध्ये धेरै २० देखि ३० वर्षको उमेर समूहमा पर्छन् । महिलाहरू, बालबालिका र ५० वर्षभन्दा माथिका पुरुष पहिलेका युद्धविराम सम्झौताअनुसार नै मुक्त भइसकेका छन् ।

युद्धअघि जीवित रहेको मानिएकी एक महिला, इनबार हाइमान, २६ जनामध्ये एक हुन्, जसलाई गरिएको खोजीपछि मृत घोषित गरिएको छ ।

अलुमिम किबुत्जबाट अपहरणमा परेका थिए विपिन
विपिन जोशी दक्षिण इजरायलको अलुमिम किबुत्जमा कृषि काममा संलग्न नेपाली विद्यार्थी थिए । त्यही क्रममा हमासले अपहरण गरेका थिए । हालै उनको परिवारले इजरायली सेनाले गाजाबाट पाएको एउटा भिडियोमा विपिन देखिएको पुष्टि गरेको छ । उक्त दृश्य २०२३ नोभेम्बरतिर खिचिएको अनुमान गरिएको छ ।

बन्धक परिवारहरूको संयोजक समूहले एक वक्तव्य जारी गर्दै भनेको छ “भिडियोले हामीलाई यो विश्वास अझै प्रस्ट गराएको छ कि विपिन जीवित नै छन् ।”

इजरायली अधिकारीहरूले पहिले नै उनको अवस्थाबारे चिन्ता व्यक्त गरेका थिए ।

थप चार विदेशी अझै गाजामै
विपिनबाहेक गाजामा अन्य चार विदेशी नागरिक पनि रहेको जानकारी सार्वजनिक भएको छ । तीमध्ये तीन जना थाइल्यान्डका र एक जना तान्जानियाका हुन् । थाइल्यान्डका सोनथाया ओक्कारास्री र सुदथिसाक रिन्थालक तथा तान्जानियाका जोशुआ मोलेललाई इजरायली पक्षले मृत घोषणा गरिसकेको छ । बाँकी एक थाइ नागरिक जीवित रहेको विश्वास गरिएको छ ।