माओवादी केन्द्रको सातौँ पूर्ण बैठक सुरु, प्रचण्डद्वारा विशेष महाधिवेशनको प्रस्ताव

काठमाडौं । नेकपा (माओवादी केन्द्र) को केन्द्रीय समितिको सातौँ पूर्ण बैठक बिहीबारदेखि काठमाडौंको प्रज्ञा भवन, कमलादीमा सुरु भएको छ ।

बैठकमा पार्टी अध्यक्ष पुष्पकमल दाहाल ‘प्रचण्ड’ले राजनीतिक तथा संगठनात्मक प्रस्ताव प्रस्तुत गरेका छन् । उनले अहिलेको केन्द्रीय समिति विघटन गरी विशेष महाधिवेशनमा जाने र आफ्नै नेतृत्वमा आयोजक समिति गठन गर्ने प्रस्ताव अघि सारेका हुन् ।

प्रचण्डले तोकिएको समयमा नै निर्वाचन हुनुपर्नेमा जोड दिँदै पार्टीको ध्यान निर्वाचन तयारीमा केन्द्रीत गर्नुपर्ने बताएका छन् ।

बैठकलाई सम्बोधन गर्दै प्रचण्डले देश हालसम्मकै गम्भीर सङ्कटमा परेको उल्लेख गरे । उनले जिम्मेवारीबाट पन्छिने पक्षमा नभएको तर अध्यक्ष पदमा टाँस्सिरहन पनि नचाहेको स्पष्ट पारे । उनले भने, “जिम्मेवारीबाट पन्छिने पक्षमा म छैन, तर मलाई पदमै बसिरहनुपर्छ भन्ने पनि लाग्दैन । निश्चित विधि र प्रक्रियाबाट नयाँ नेतृत्वमा जानुपर्छ, कसैलाई टीको लगाएर होइन ।”

माओवादीका अनुसार प्रचण्डले प्रस्तुत गरेको राजनीतिक तथा संगठनात्मक प्रस्तावमाथि प्रदेशअनुसार प्रतिनिधि विभाजन गरी छलफल हुनेछ र त्यसबारे समूह नेताले बैठकमा प्रतिवेदन दिनेछन् ।