चाडपर्व लक्षित व्यवस्थाः सार्वजनिक सवारीका लागि रूट परमिट खुला, असोज २२ सम्म मान्य

काठमाडौं । चाडपर्वमा यात्रु आवागमन सहज बनाउन सरकारले आज (सोमबार) देखि देशभर सार्वजनिक यातायातका सवारी साधनका लागि रूट परमिट खुला गरेको छ । नेपाल यातायात व्यवसायी राष्ट्रिय महासङ्घका अध्यक्ष विजयबहादुर स्वाँरका अनुसार यो व्यवस्था असोज २२ गतेसम्म कायम रहनेछ ।

अब सार्वजनिक सवारी साधनले पूर्वनिर्धारित रूट नलिए पनि गन्तव्यसम्म पुग्न पाउनेछन् । तर, भौगोलिक र प्राविधिक हिसाबले केही विशेष रूटमा निषेधित सवारी प्रकारहरूमा भने पुरानै बन्देज लागू हुनेछ ।

महासङ्घका अनुसार यात्रुहरूले सार्वजनिक यातायात प्रयोग गर्दा अनिवार्य रूपमा टिकट लिनुपर्नेछ । साथै, चाडपर्वमा सडकमा भीडभाड कम गर्न सरकारले खाद्यान्न र अत्यावश्यक वस्तु बाहेकका ट्रेलरलगायत ठूला सवारी साधनहरूलाई आजदेखि पूर्णिमासम्म नारायणघाटदेखि काठमाडौंसम्म सञ्चालनमा रोक लगाउने निर्णय पहिले नै गरिसकेको छ ।

यो व्यवस्था यात्रुलाई सुरक्षित र व्यवस्थित यात्रा सुविधा दिने उद्देश्यले गरिएको हो ।