काठमाडौं उपत्यकामा दिउँसोको कर्फ्यु हट्यो, निषेधाज्ञा जारी

काठमाडौं । नेपाली सेनाले काठमाडौं उपत्यकामा दिउँसोको कर्फ्यु हटाउँदै निषेधाज्ञा समेत खुकुलो बनाएको छ ।

सेनाले जारी गरेको सूचनाअनुसार अब कर्फ्यु आज बेलुकी ७ बजेदेखि भदौ २८ गते बिहान ६ बजेसम्म मात्र लागू हुनेछ । दिउँसो भने उपत्यकामा कर्फ्यु हटाइएको छ।

त्यस्तै, निषेधाज्ञा पनि पूर्णरूपमा नलाग्ने गरी खुकुलो पारिएको छ । सेनाले बिहान ११ बजेदेखि साँझ ५ बजेसम्म मात्र निषेधाज्ञा जारी हुने जानकारी दिएको छ । बिहान ११ बजेसम्म निषेधाज्ञा पूर्णरूपमा हटाइएको छ ।

जेनजी प्रदर्शनका क्रममा भएका हिंसात्मक घटनापछि लागू गरिएको सुरक्षा व्यवस्था क्रमशः सहज बनाइँदै गएको छ । यसैक्रममा कर्फ्यु र निषेधाज्ञा खुकुलो बनाइएसँगै काठमाडौं उपत्यकाको जनजीवन सामान्य अवस्थामा फर्कन थालेको छ ।

आज बिहान अघिल्लो दिनको तुलनामा सवारीसाधनको चाप बढेको देखिएको छ, जसले जनजीवन सामान्य बन्दै गएको संकेत गरेको छ ।