जेनजी आन्दोलनको चर्किँदो परिस्थितिमाथि रास्वपाको आकस्मिक बैठक

काठमाडौं । राष्ट्रिय स्वतन्त्र पार्टी (रास्वपा) ले आज दिउँसो आकस्मिक बैठक आह्वान गरेको छ । प्रवक्ता मनिष झाका अनुसार दिउँसो ४ बजे बस्ने सचिवालय बैठकमा जेनजी आन्दोलन र त्यसमा भएको प्रहरी दमनबारे विस्तृत छलफल हुनेछ ।

आजै संसद् भवन वरिपरि भएको प्रदर्शनमा प्रहरीले गोली चलाउँदा एक प्रदर्शनकारीको ज्यान गएको छ भने धेरैजना घाइते भएका छन् । घाइतेहरूलाई सिभिलसहित विभिन्न अस्पतालमा उपचारका लागि लगिएको छ ।

सरकारले नयाँबानेश्वर क्षेत्रमा कर्फ्यु आदेश जारी गरे पनि विरोध प्रर्दशन अझ आक्रामक बनेको छ । आक्रोशित भीड र सुरक्षाकर्मीबीच झडप जारी रहँदा वातावरण थप तनावपूर्ण बनेको छ ।