अर्घाखाँचीमा पत्नीको हत्या गरेर श्रीमान्ले भान्छामै गाडे शव

काठमाडौं । अर्घाखाँचीमा एक पुरुषले आफ्नै पत्नीको हत्या गरेर भान्छाकोठामै शव गाडेको घटना सार्वजनिक भएको छ ।

जिल्ला प्रहरी कार्यालय अर्घाखाँचीका अनुसार छत्रदेव गाउँपालिका–४ पातलेपोखरामा बसोबास गर्दै आएका ३६ वर्षीय किरण गुरुङले ३४ वर्षीया पत्नी सुमित्रा कुमाल गुरुङलाई हत्या गरी घरको भान्छामै गाडेका थिए ।

प्यूठानको नौबहिनी गाउँपालिका–१ स्याउलीबाङ घर भएका किरण विगत आठ वर्षदेखि सोही गाउँमा घर किनेर बस्दै आएका थिए । उनी पत्नी सुमित्रा र ९ वर्षीया छोरी सरुसँग बस्दै आएका थिए ।

तर, केही दिनयता सुमित्रा हराएपछि माइती पक्षले १६ भदौमा प्रहरीलाई खोजी गरिदिन जानकारी दिएका थिए । अनुसन्धानको क्रममा १२ भदौको राति श्रीमान्–श्रीमतीबीच विवाद हुँदा हत्या भएको तथ्य खुलेको जिल्ला प्रहरी प्रमुख तथा डीएसपी चक्र मल्लले बताए ।

प्रारम्भिक अनुसन्धानअनुसार, विवादपछि किरणले बाँसको लाठ्ठी र हंसियाले प्रहार गरी पत्नीको हत्या गरेका थिए । उनले शवलाई कम्बलमा पोको पारेर भान्छाकोठामा खाल्डो खनेर गाडेका थिए । घरभित्र दुर्गन्ध आउन थालेपछि प्रहरीले उत्खनन् गर्दा शव भेटिएको हो ।

१६ भदौको राति साढे ८ बजे शव निकालिएको थियो । शव पोष्टमार्टमका लागि जिल्ला अस्पताल अर्घाखाँची पठाइएको छ । किरणलाई प्रहरीले नियन्त्रणमा लिएर कर्तव्य ज्यान मुद्दामा अनुसन्धान अघि बढाएको छ ।

प्रहरीले घटनास्थलबाट हत्या गर्न प्रयोग गरिएको बाँसको लाठ्ठी, हँसिया, गैंती, बेल्चा, सानो कोदालो बरामद गरेको छ । त्यस्तै, ‘ओरेन्ज’ लेखिएको मदिराको खाली र भरी बोतल पनि भेटिएको छ ।

अनुसन्धानले देखाएअनुसार, किरणले हत्या गर्ने बेला मदिरा सेवन गरेका थिए । हत्या भएपश्चात उनले छोरीलाई समेत धम्की दिएकाले ९ वर्षीया सरुले घटनाबारे कसैलाई भन्न नसकेको प्रहरीको भनाइ छ ।

प्रहरीका अनुसार किरण र सुमित्रा १० वर्षदेखि प्रेम सम्बन्धमा रहेका थिए । दुवैको दोस्रो विवाह थियो । किरणको पूर्वश्रीमतीबाट २ छोरी र सुमित्राको पूर्वश्रीमान्‌बाट ३ छोरी रहेका थिए ।