गोरखामा बस दुर्घटना हुँदा २१ जना घाइते

काठमाडौं । गोरखामा मंगलबार बिहान भएको बस दुर्घटनामा २१ जना घाइते भएका छन् ।

जिल्ला प्रहरीले जानकारी दिएअनुसार काठमाडौंबाट आरुघाटतर्फ जाँदै गरेको बाग्मती प्रदेश ०१–००६ ख ४१३१ नम्बरको बस भीमसेन थापा गाउँपालिका–३ मा दुर्घटनाग्रस्त भएको हो ।

घाइतेमध्ये १७ जनाको आरुघाट आधारभूत अस्पतालमा उपचार भइरहेको छ भने गम्भीर घाइते ४ जनालाई अन्यत्र रिफर गरिएको अस्पतालका मेडिकल अधिकृत डा. अमरेश कुमार मण्डलले बताए ।

उनका अनुसार खुट्टा फ्याक्चर भएका र टाउकोमा चोट लागेका गम्भीर अवस्थाका यात्रुलाई तत्काल थप उपचारका लागि रिफर गरिएको हो । बाँकी घाइतेहरूको अवस्था सामान्य रहेको जनाइएको छ ।