माओवादी केन्द्रको केन्द्रीय समिति बैठक सम्पन्न, सम्पत्ति सार्वजनिक गर्ने प्रचण्डको घोषणा

काठमाडौं । नेकपा (माओवादी केन्द्र) को केन्द्रीय समितिको सातौं पूर्ण बैठक सम्पन्न भएको छ । काठमाडौं प्रज्ञा प्रतिष्ठान, कमलादीमा बिहीबार सुरु भएको बैठक शुक्रबार अध्यक्ष पुष्पकमल दाहाल ‘प्रचण्ड’ को प्रतिवेदन संशोधनसहित पारित गर्दै सम्पन्न भएको हो ।

बैठकमा प्रचण्डले केन्द्रीय समिति भंग गरेर महाधिवेशन आयोजक समिति गठन गर्ने प्रस्ताव राखेका थिए, जसलाई बैठकले स्वीकार गरेको छ । यससँगै माओवादीको केन्द्रीय समिति महाधिवेशन आयोजक समितिमा रूपान्तरण भएको छ । बैठकले आगामी मंसिरमा विशेष महाधिवेशन गर्ने प्रस्ताव पनि पारित गरेको छ ।

नेतृत्व सम्बन्धी अन्य प्रस्ताव भने अस्वीकृत भएका छन् । वरिष्ठ उपाध्यक्ष नारायणकाजी श्रेष्ठले प्रतिनिधि सभाको चुनाव (फागुन २१) पछि महाधिवेशन गर्नुपर्ने प्रस्ताव गरेका थिए भने प्रचण्डले कार्यवाहक अध्यक्षको जिम्मेवारी आफूलाई दिनुपर्ने प्रस्ताव राखेका थिए । यी दुवै प्रस्ताव अस्वीकृत भए । उपमहासचिव जनार्दन शर्माले सबै पदाधिकारीलाई नयाँ टिममार्फत प्रतिस्थापन गर्ने र हालका पदाधिकारीलाई निर्देशक समितिमा रूपान्तरण गर्ने प्रस्ताव राखेका थिए, तर त्यो पनि अस्वीकृत भयो ।

तीनवटा प्रस्तावमाथि छलफलपछि जवाफ दिँदै प्रचण्डले उठेका विषयलाई गम्भीरतापूर्वक लिएर अघि बढ्ने प्रतिबद्धता जनाए । साथै, उनले सबै माओवादी नेताहरूको सम्पत्ति सार्वजनिक गर्ने घोषणा गरे ।

सुदूरपश्चिम प्रदेशका प्रतिनिधि समूहका तर्फबाट हरि ज्ञवाली अखण्डले प्रस्तुत गरेको निष्कर्षमा सम्पत्ति छानबिन आयोग गठनको प्रस्ताव राखिएको थियो । जसअनुसार पूर्व महालेखा परीक्षक वा स्वतन्त्र व्यक्तिहरूको सहभागितामा कार्यविधि तयार गरी आयोग गठन गर्ने भनिएको छ ।

यसै सन्दर्भमा प्रचण्डले सम्पत्ति छानबिन आयोग गठन गरेर सबै नेताहरूको सम्पत्ति सार्वजनिक गरिने स्पष्ट घोषणा गरेका हुन् ।