विश्वकपमा स्मार्ट सेन्सरसहितको ‘ट्रियोन्डा’ बल प्रयोग हुँदै

काठमाडौं । विश्व फुटबल महासंघ (फिफा) ले केही दिनपछि सुरु हुने विश्वकपका लागि ‘ट्रियोन्डा’ नामक नयाँ आधिकारिक म्याच बल प्रयोग गर्दैछ । आधुनिक प्रविधिले सुसज्जित यो बलले खेलको निष्पक्षता र निर्णय प्रक्रियालाई अझ प्रभावकारी बनाउने अपेक्षा गरिएको छ ।

ट्रियोन्डाको सबैभन्दा ठूलो विशेषता यसको स्मार्ट सेन्सर प्रणाली हो । बलभित्र जडान गरिएको अत्याधुनिक मोसन सेन्सरले बलको गति, दिशा, घुमाइ तथा खेलाडीले छोएको क्षणसमेत वास्तविक समयमा रेकर्ड गरी सम्बन्धित प्रणालीमा पठाउँछ । यसबाट भिडियो असिस्टेन्ट रेफ्री (भीएआर) लाई सही निर्णय लिन थप सहयोग पुग्नेछ ।

फिफाका अनुसार बलभित्र रहेको १४ ग्राम तौलको सेन्सरले प्रतिसेकेन्ड ५०० पटकसम्म डेटा संकलन गर्न सक्छ । यसले बलको प्रत्येक गतिविधि सूक्ष्म रूपमा निगरानी गर्ने भएकाले अफसाइड, ह्यान्डबल वा अन्य विवादास्पद अवस्थाको विश्लेषण अझ सटीक हुने अपेक्षा गरिएको छ ।

विशेष प्रविधियुक्त उक्त सेन्सर आफैं चार्ज हुने ब्याट्रीबाट सञ्चालन हुन्छ । बलको केन्द्र भागमा राखिएको सेन्सरले खेलका क्रममा बलको सन्तुलन र उडानको स्थिरतामा कुनै असर नपर्ने गरी डिजाइन गरिएको फिफाले जनाएको छ ।

ट्रियोन्डाको बाहिरी डिजाइन पनि आकर्षक बनाइएको छ । यसको चार-प्यानल संरचना र विशेष रंग संयोजनले विश्वकपका तीन आयोजक राष्ट्रहरूको प्रतिनिधित्व गर्छ । आधुनिक प्रविधि र नवीन डिजाइनको संयोजनले ट्रियोन्डालाई विश्व फुटबलको नयाँ पुस्ताको म्याच बलका रूपमा प्रस्तुत गरेको छ ।

फिफाको विश्वास छ कि यस्तो प्रविधिको प्रयोगले खेलका क्रममा हुने मानवीय त्रुटि घटाउने मात्र होइन, विश्वकपलाई अझ निष्पक्ष, प्रतिस्पर्धात्मक र रोमाञ्चक बनाउन समेत योगदान पुर्‍याउनेछ ।