भदौ ११ मा राज्य व्यवस्था समितिको सभापति निर्वाचन

काठमाडौं । प्रतिनिधि सभा अन्तर्गतको राज्य व्यवस्था समितिको सभापतिको निर्वाचन यही भदौ ११ गते हुने भएको छ । सभामुख देवराज घिमिरेले सोमबार निर्वाचन तालिका तोकेका हुन् ।

निर्वाचन मिति तोक्नुअघि सभामुख घिमिरेले आइतबार दिनभर विभिन्न राजनीतिक दलका प्रतिनिधिसँग छलफल गरेका थिए । समितिको सभापति पद गत साउन २८ गतेदेखि रिक्त छ । कानुनी प्रावधानअनुसार रिक्त पदमा १५ दिनभित्र नयाँ नेतृत्व चयन गर्नुपर्ने हुन्छ ।

यसअघि सभापति रहेका रामहरि खतिवडाले निजामती सेवा विधेयकमा ‘कुलिङ पिरियड’ सम्बन्धी विवादका कारण पदत्याग गरेका थिए । त्यसयता समिति नेतृत्वविहीन बनेको छ ।

सचिवालयका अनुसार हाल समितिमा चार वटा विधेयक दफावार छलफलमै रोकिएका छन् । नेपाल प्रहरी विधेयक, सशस्त्र प्रहरी बल विधेयक, निर्माणमुखी सामग्री व्यवस्थापन तथा नियमन विधेयक र अख्तियार दुरुपयोग अनुसन्धान आयोग (तेस्रो संशोधन) विधेयक समितिमा रोकिएको छ ।

यसका अतिरिक्त ७२ भन्दा बढी उजुरी पनि समितिमा विचाराधीन अवस्थामा रहेका छन् ।

सभापति अभावकै कारण समिति बैठक दुई महिनादेखि बस्न सकेको छैन । नयाँ नेतृत्व चयन भएपछि समितिको कामकाज अघि बढ्ने अपेक्षा गरिएको छ ।