भारतमा नेपाली नक्कली नोट छाप्ने गिरोहमाथि कारबाही, तीन नेपालीसहित १० जना पक्राउ

काठमाडौं । भारतमा नेपाली नक्कली नोट छाप्ने अन्तर्राष्ट्रिय गिरोहविरुद्ध भारतीय सुरक्षाकर्मीले ठूलो कारबाही गरेका छन् । नक्कली नोट उत्पादन गरी नेपालमा पैठारी गर्ने योजनामा संलग्न तीन नेपाली नागरिकसहित १० जनालाई पक्राउ गरिएको भारतीय प्रहरीले जनाएको छ ।

बिहार राज्यको सीतामढी जिल्लाअन्तर्गत मेजरगञ्ज क्षेत्रमा पूर्वी चम्पारण प्रहरी र स्पेशल टास्क फोर्स (एसटीएफ) ले संयुक्त रूपमा छापा मार्दा अत्याधुनिक नक्कली नोट छाप्ने कारखाना फेला परेको हो । प्रहरीले कारखानालाई पूर्ण रूपमा नष्ट गरेको जनाएको छ ।

छापाको क्रममा प्रहरीले करिब २५ लाख नेपाली रुपैयाँ बराबरका नक्कली नोट, एक लाख ४० हजार सक्कली नेपाली रुपैयाँ, एक हजार ८५० नक्कली भारतीय नोट बरामद गरेको छ । साथै, हाइटेक प्रिन्टिङ मेसिन, नोट छपाइमा प्रयोग हुने विशेष कागजका २२ बण्डल, विभिन्न रसायन र अन्य सामग्रीसमेत नियन्त्रणमा लिइएको छ । नक्कली नोट ओसारपसारमा प्रयोग गरिएका तीनवटा मोटरसाइकल र एउटा कार पनि प्रहरीले जफत गरेको छ ।

प्रारम्भिक अनुसन्धानअनुसार गिरोहले खुला नेपाल–भारत सिमानाको फाइदा उठाउँदै निर्वाचनको समयमा नेपालमा नक्कली नोट तस्करी गरी बजारमा फैलाउने योजना बनाएको खुलेको छ ।

भारतीय प्रहरीले निर्वाचनजस्तो संवेदनशील समयमा आर्थिक अराजकता सिर्जना गर्ने र राजनीतिक गतिविधिलाई प्रभावित पार्ने उद्देश्यले यो सुनियोजित गतिविधि भएको आशंका गरेको छ । नक्कली नोटको कारोबार राष्ट्रिय सुरक्षा, आर्थिक स्थायित्व र निर्वाचन प्रक्रियाका लागि गम्भीर खतरा भएको भन्दै घटनालाई उच्च प्राथमिकतामा राखेर अनुसन्धान अघि बढाइएको प्रहरीले जनाएको छ ।

हाल नेपाल र भारत दुवै देशमा सक्रिय यस गिरोहका अन्य सदस्यहरूको खोजी तीव्र पारिएको बताइएको छ ।