पूर्व राष्ट्रपति भण्डारीको नयाँ सम्पर्क कार्यालय सञ्चालनमा

काठमाडौं । एमालेको विरोधबीच पूर्व राष्ट्रपति विद्यादेवी भण्डारीले सक्रिय राजनीतिमा फर्किने घोषणा गर्दै नयाँ सम्पर्क कार्यालय सञ्चालनमा ल्याउने भएकी छन् ।

भण्डारीले बिहीबार राजधानीको थापागाउँस्थित लाखेचौर मार्गमा रहेको एक घरबाट सम्पर्क कार्यालय सुरु गर्न लागेकी हुन् । उक्त कार्यालयको उद्घाटन स्वयं भण्डारीले गर्ने तयारी छ ।

उद्घाटन कार्यक्रममा एमालेका केन्द्रीय नेताहरूसमेतलाई निमन्त्रणा गरिएको बताइएको छ । नाममा ‘मदन भण्डारी ७५ औँ जन्मजयन्ती मूल व्यवस्थापन समिति’को कार्यालय भनिए पनि यसै कार्यालयमार्फत भण्डारीले आफ्ना राजनीतिक गतिविधि सञ्चालन गर्ने भण्डारी निकटस्थहरूको दाबी छ ।

उक्त समितिको संयोजक एमाले नेता तथा बागमती प्रदेशका पूर्वमुख्यमन्त्री डोरमणि पौडेल रहेका छन् भने भण्डारी संरक्षकका रूपमा छन् । यसअघि भण्डारीको ७५औँ जन्मजयन्ती मनाउन पौडेलको नेतृत्वमा ७५ सदस्यीय मूल व्यवस्थापन समिति गठन गरिएको थियो ।