एमालेका पूर्वसांसद देवीप्रसाद भट्टचन ठगी आरोपमा पक्राउ

काठमाडौं । प्रहरीको केन्द्रीय अनुसन्धान ब्युरो (सीआईबी) ले नेकपा एमालेका पूर्वसांसद देवीप्रसाद भट्टचनलाई ठगी आरोपमा मंगलबार ललितपुरबाट पक्राउ गरेको छ ।

भट्टचनमाथि ९८ करोड रुपैयाँ ठगी गरेको आरोप लागेको छ । प्रभु म्यानेजमेन्टकी अध्यक्ष कुसुम लामाले उनीविरुद्ध उजुरी दिएकी थिइन् । लामाका अनुसार, लामो समयदेखि उजुरी परे पनि भट्टचन कानुनी कारबाहीबाट जोगिँदै आएका थिए ।

२०७९ को निर्वाचनमा नेकपा एमालेले उनलाई समानुपातिक प्रणालीअन्तर्गत जनजातीतर्फ पहिलो नम्बरमा राख्दै सांसद बनाएको थियो । त्यसअघि उनी नेपाली कांग्रेससँग आबद्ध थिए । १४औँ महाधिवेशनअघि कांग्रेस सभापति शेरबहादुर देउवाले उनलाई संगठन विभागको उपप्रमुखमा मनोनीत गरेका थिए ।

भट्टचनले सन् १९९० मा ‘प्रभु ट्राभल’ मार्फत व्यवसायिक यात्रा सुरु गरेका थिए । पछि उनले वित्तीय संस्था, कार्गो व्यवसाय र प्रभु हेलिकप्टर सेवा पनि सञ्चालन गरे । हाल उनी प्रभु ग्रुपका अध्यक्षका रूपमा समेत परिचित छन् ।

सीआईबीले अनुसन्धान अघि बढाइरहेको छ भने भट्टचनमाथि ठगीसम्बन्धी थप मुद्दा दर्ता हुन सक्ने संकेत देखिएको छ ।