बीपी राजमार्गमा बढ्यो सवारी चाप, मालवाहकलाई राति मात्र सञ्चालन गर्न अनुमति

काठमाडौं । पृथ्वी राजमार्गअन्तर्गत कृष्णभिरमा केही दिनअघि आएको बाढीका कारण सडक अवरुद्ध भएपछि बीपी राजमार्गमा सवारीसाधनको चाप बढेको छ । सवारी चाप बढेसँगै काभ्रेपलाञ्चोक जिल्ला प्रशासन कार्यालयले राजमार्गमा ट्राफिक व्यवस्थापनका लागि आलोपालो प्रणाली लागू गरेको छ ।

जिल्लास्थित सुरक्षा समितिको बैठकले मालवाहक सवारीसाधनलाई रातको समयमा मात्र सञ्चालन गर्न दिने निर्णय गरेको छ । साथै, बीपी राजमार्गमा १० टनभन्दा बढी तौलका सवारीसाधन सञ्चालनमा कठिनाइ हुने भएकाले तौल सीमा कायम गरिएको प्रशासनले जनाएको छ ।

प्रमुख जिल्ला अधिकारी गोपालकुमार अधिकारीका अनुसार सडकमा जाम हुन नदिन ट्राफिक प्रहरी तथा जिल्ला प्रशासन कार्यालय सिन्धुलीसँग समन्वय गरी सवारी सञ्चालनको समय व्यवस्थापन गरिएको छ । धुलिखेलबाट खुर्कोटतर्फ जाने र खुर्कोटबाट धुलिखेलतर्फ आउने मालवाहक सवारीसाधन बाटोमा एकआपसमा क्रस नहुने गरी सम्भव भएसम्म समय मिलाइएको उनले बताए ।

ग्यास बुलेटलगायत ठूला मालवाहक सवारीसाधनलाई बीपी राजमार्गको धुलिखेल–भकुण्डे सडकखण्डमा सुरक्षाकर्मीको उपस्थितिमा मात्रै सञ्चालन गर्न दिइने व्यवस्था गरिएको छ ।

यसैबीच, डिभिजन सडक कार्यालय भक्तपुरले दुर्घटनाको जोखिम रहेका साँघुरा घुम्ती तथा सडक अवरुद्ध हुनसक्ने स्थान पहिचान गरी तत्काल सुधारका काम अघि बढाउने जनाएको छ ।

कार्यालयका प्रमुख वरिष्ठ डिभिजनल इन्जिनियर सुमन योगेशले जोखिमयुक्त स्थानमा सवारीसाधनलाई सहज रूपमा आवतजावत गराउन तथा सडक अवरुद्ध हुन नदिन डोजरलगायत आवश्यक उपकरण तयारी अवस्थामा राखिएको जानकारी दिए ।