२५औँ मातृभाषा साहित्य श्रङ्खलाः मातृभाषाप्रेमी तथा साहित्यकार सम्मानित

काठमाडौं । नेपाल प्रज्ञा–प्रतिष्ठान मातृभाषा साहित्य विभागको आयोजनामा २५औँ मातृभाषा साहित्य शृङ्खला सम्पन्न भएको छ । उक्त अवसरमा मातृभाषा संरक्षणमा योगदान पुर्‍याउँदै आएका मातृभाषाप्रेमी तथा साहित्यकारहरूलाई सम्मान गरिएको छ ।

कार्यक्रममा शिव सुनुवार, बयनसिङ राई, प्रतापसिङ नाछिरिङ, भूपध्वज थोम्रास, अन्जु राजवंशी, नातिकाजी महर्जन र सन्तोषी चौधरीलाई सम्मान गरिँदै ‘मातृभाषाासेवी’ उपाधि र सम्मानपत्र प्रदान गरिएको थियो ।

सम्मानित स्रष्टाहरूले मातृभाषामा अनुसन्धान, लेखन, प्रकाशन र सिर्जनाको माध्यमबाट समुदायभित्र चेतना फैलाउन महत्त्वपूर्ण भूमिका खेलेका छन् ।

शुक्रबार नेपाल प्रज्ञा प्रतिष्ठान कमालादीमा भएको कार्यक्रममा नेपाल प्रज्ञा प्रतिष्ठान प्राज्ञ परिषदका कुलपति भुपाल राई,  साहित्य (मातृभाषा) विभागका प्रमुख राजन  मुकारुङ, सदस्य सचिव डा. धनप्रसाद सुवेदीलगायतको उपस्थिति थियो । त्यस अवसरमा विभिन्न मातृभाषाप्रेमी तथा साहित्यकारहरुले आ–आफ्नो लेख, रचना तथा कविता वाचन गरेका थिए ।

समापन चरणमा ‘मातृभाषा साहित्य शृङ्खला’लाई अझ प्रभावकारी बनाउँदै लैजाने प्रतिबद्धता व्यक्त गर्दै आगामी संस्करण अझ व्यापक बनाइने घोषणा गरिएको थियो ।