प्रहरी नेतृत्वमा फेरबदलः दीपक थापाको समापन, चन्द्रकुबेर खापुङको सुरुवात

काठमाडौं । मुलुकको जनजीवनसँग नजिक रहेको नेपाल प्रहरीको नेतृत्व आज मध्यरातदेखि परिवर्तन हुँदैछ । ३१औं प्रहरी महानिरीक्षक (आईजीपी)का रूपमा कार्यरत दीपक थापा १७०औं दिनको दिन अर्थात् आज राति १२ बजेबाट अवकाश लिँदैछन् । अब आगामी दुई महिनाका लागि संगठनको नेतृत्व चन्द्रकुबेर खापुङले सम्हाल्ने भएका छन् ।

थापाको नेतृत्वः अपेक्षा र निराशा

चैत ५, २०८१ मा आईजीपीको जिम्मेवारी सम्हालेका थापा जागिरकै अन्तिम अध्यायमा संगठनको उच्चतम पदमा पुगेका थिए । कर्तव्यप्रति दत्तचित्त र कार्यक्षमतामा अब्बल मानिने थापाबाट आम जनताले ठूलो अपेक्षा गरेका थिए । तर, नेतृत्वमा पुगेपछि उनी त्यस अपेक्षा पूरा गर्न चुकेको मूल्यांकन भइरहेको छ ।

उनको नेतृत्वमा तीनकुने घटनामा देखिएको प्रहरीको भूमिका, ठेक्का प्रकरण, सरुवामा चलखेल र संगठनप्रति आफ्नै कर्मचारीहरूको असन्तोषजस्ता विषय बढी चर्चामा रहे । यसबाहेक प्रहरी मुख्यालयमै उद्घाटन र शिलान्यासमा केन्द्रित भएको भन्दै आलोचना पनि भयो । उनले आईजीपी निवास परिसरमा ‘श्री दीप कुञ्ज’ नामक भवन उद्घाटन गरेर आफ्नै नाम अमर बनाउने शैली पनि देखाए ।

छोटो कार्यकाल, सीमित उपलब्धि

६ महिनाभन्दा कम समयको नेतृत्वमा थापाले ठोस उपलब्धि हासिल गर्न सकेनन् भन्ने धारणा बलियो छ । कतिपयले ‘जम्मा ६ महिनामा के नै गर्न सकिन्छ ?’ भन्ने तर्क गरे पनि, केही सकारात्मक सुरुवात गर्न सक्ने अवसर उनले गुमाएको आलोचकहरूको बुझाइ छ । विगतमा फिल्डमा रहँदा कमाण्डिङ क्षमतामा अब्बल मानिएका थापा, शीर्ष नेतृत्वमा पुगेपछि भने औसतभन्दा तलको प्रदर्शनमा सीमित भएको मूल्यांकन गरिएको छ ।

खापुङप्रति आशा

अब नेतृत्व चन्द्रकुबेर खापुङको हातमा आएको छ । दुई महिनाको छोटो कार्यकाल भए पनि उनीमाथि ठूलो अपेक्षा राखिएको छ । प्रहरी संगठनमा व्याप्त विवाद, कर्मचारीबीचको अविश्वास र जनताको सुरक्षा अपेक्षा व्यवस्थापन गर्न खापुङ सक्षम हुन्छन् कि भन्ने प्रश्न खडा भएको छ ।

जनताले चाहेको छ— छोटो भए पनि पारदर्शी, शुद्ध र अनुकरणीय नेतृत्व । यदि खापुङले सोही दिशामा कदम चाल्न सके भने उनी थापामाथिको आलोचना शान्त पार्ने मात्र होइन, संगठनको मनोबललाई पनि पुनर्जीवित गराउन सक्नेछन् ।

दीपक थापाको ३० वर्ष लामो सेवाजीवन उत्कृष्टबाट सुरु भएर औसत हुँदै निराशाजनक समापनमा पुग्यो भन्ने आँकलन गरिएको छ । अब उनले सामान्य नागरिकको रूपमा सुखमय जीवन बिताउन सकून् भन्ने शुभकामना । उता, खापुङको छोटो कार्यकाल सफल होस्, उनले प्रहरी नेतृत्वमा सकारात्मक छाप छाडून् भन्ने जनअपेक्षा उच्च छ ।