भूमि समस्या समाधान समितिमा नयाँ नेतृत्व, मन्त्रिपरिषद्का चार निर्णय सार्वजनिक

काठमाडौं । सरकारले भूमि समस्या समाधान समितिको अध्यक्षमा कास्कीका बलभद्र बास्कोटालाई नियुक्त गरेको छ । मंगलबार बसेको मन्त्रिपरिषद् बैठकका निर्णय सार्वजनिक गर्दै सरकारका प्रवक्ता तथा शिक्षा, विज्ञान तथा प्रविधिमन्त्री सस्मित पोखरेलले उक्त जानकारी दिएका हुन् ।

भूमि व्यवस्था, सहकारी तथा सङ्घीय मामिला एवं सामान्य प्रशासन मन्त्रालयको प्रस्तावमा बास्कोटालाई समितिको अध्यक्ष नियुक्त गरिएको हो । समितिका सदस्यमा काठमाडौंका अमिरप्रसाद न्यौपाने, लमजुङका पद्मनिति सोती र काठमाडौंकी डा। रोहना श्रेष्ठ नियुक्त भएका छन् ।

बैठकले यससँगै अन्य तीन महत्वपूर्ण निर्णयसमेत गरेको छ ।

ओजोन तह संरक्षण सम्झौता स्वीकृत
संयुक्त राष्ट्रसंघीय वातावरण कार्यक्रम (यूएनईपी) अन्तर्गत ओजोन तहलाई हानी पुर्‍याउने पदार्थको व्यवस्थापन र न्यूनीकरणसम्बन्धी ‘मोन्ट्रियल प्रोटोकल’ कार्यान्वयन सम्झौतालाई बैठकले स्वीकृत गरेको छ । यो जलवायु परिवर्तनसँग सम्बन्धित सम्झौता हो ।

सशस्त्रको एआईजीमा बढुवा
सशस्त्र प्रहरी बल नेपालको रिक्त सशस्त्र प्रहरी अतिरिक्त महानिरीक्षक (एआईजी) पदमा अञ्जनीकुमार पोखरेललाई बढुवा गर्ने निर्णय भएको छ । गृहमन्त्रालयको प्रस्तावमा यो निर्णय भएको हो ।

अध्ययन समितिको म्याद थप
२०८२ साल भदौ २३ र २४ गते भएको प्रदर्शनका क्रममा सिर्जित घटनाबारे जाँचबुझ आयोगको प्रतिवेदनमा उल्लेखित सुरक्षा संयन्त्रको हकमा अध्ययन गरी सिफारिस गर्न गठित समितिको कार्यअवधि ४५ दिन थप गरिएको छ ।