एनपीएल दोस्रो संस्करणको तयारी पूरा, पुरस्कार राशि पहिलो संस्करणकै यथावत

काठमाडौं । नेपाल प्रिमियर लिग (एनपीएल) को दोस्रो संस्करणका लागि सम्पूर्ण तयारी पूरा भएको नेपाल क्रिकेट संघ (क्यान)ले जनाएको छ । आज (शनिबार) आयोजना गरिएको पत्रकार सम्मेलनमा क्यानले मंसिर १ गतेदेखि सुरु हुने एनपीएल–२ को तयारी पुरा भएको जानकारी गराइयो ।

क्यानका सचिव पारस खड्काका अनुसार यसपटक पहिलोपटक एनपीएलका खेलहरू फ्लडलाइटमुनि सञ्चालन हुन लागेको छ । डे–नाइट खेलहरूको उद्देश्य प्रतियोगितालाई अझ आकर्षक र अन्तर्राष्ट्रिय स्तरको बनाउन रहेको उनले बताए ।

पुरस्कार राशि यथावत
दोस्रो संस्करणमा पनि पुरस्कार राशि पहिलो संस्करणकै कायम रहने क्यान सचिव खड्काले जानकारी दिएका छन् ।

पहिलो संस्करणमा जनकपुर बोल्ट्सले विजेता बन्दै १ करोड १० लाख रुपैयाँ प्राप्त गरेको थियो । उपविजेता सुदूरपश्चिम रोयल्सले ५१ लाख, तेस्रो स्थान हासिल गर्ने कर्णाली याक्सले २५ लाख तथा चौथो हुने चितवन राइनोजले १५ लाख पुरस्कार प्राप्त गरेका थिए ।

यही संरचना यसपटक पनि कायम रहने क्यानले स्पष्ट पारेको छ ।

आयव्यय विस्तृत रूपमा सार्वजनिक
पत्रकार सम्मेलनमा क्यानका कोषाध्यक्ष पदम खड्काले आयस्रोतबारे विस्तृत जानकारी दिए । उनका अनुसार यसपटक एनपीएलमा १५ देखि ३० करोड रुपैयाँसम्म प्रायोजनबाट प्राप्त हुने अनुमान छ ।

उनले बताए अनुसार टिम ओनरसिपबाट ९ करोड प्राप्त हुनेछ । यस्तै, डिसहोम गो ले ५ करोड ३० लाख रकममा ओटीटी प्रसारण अधिकार खरिद गरेको छ भने विश्वभरबाट उठ्ने रकममध्ये ७१ प्रतिशत क्यानलाई र २९ प्रतिशत डिसहोमलाई जाने व्यवस्था मिलाइएको खड्काले बताए ।

त्यस्तै, लिनियर टिभी प्रसारण अधिकारको न्युनतम मूल्य १ करोड तोकिएको र यसभन्दा बढी रकम आउने अपेक्षा रहेको क्यानले जनाएको छ । क्यानका अनुसार टिकट बिक्रीबाट ८ देखि १२ करोड रुपैयाँ आम्दानी हुने अनुमान गरिएको छ ।

व्यक्तिगत पुरस्कारमा परिवर्तन सम्भावना
सचिव पारस खड्काले उत्कृष्ट ब्याट्सम्यान, उत्कृष्ट बलर, उदयीमान खेलाडीजस्ता व्यक्तिगत पुरस्कारमा भने केही परिवर्तन वा वृद्धि हुन सक्ने संकेत गरेका छन् । तीबारे औपचारिक घोषणा पछि गर्ने योजना छ ।

एनपीएल–२ मार्फत नेपाली क्रिकेटप्रेमीमा उत्साह थप बढ्ने र घरेलु क्रिकेटको स्तर अझ उकासिने अपेक्षा गरिएको छ ।