सरकार पारदर्शी र उत्तरदायी छैनः कांग्रेस नेता शेखर कोइराला

काठमाडौं । नेपाली कांग्रेसका वरिष्ठ नेता डा. शेखर कोइरालाले हालको सरकारप्रति कडा असन्तोष जनाउँदै त्यसलाई पारदर्शिता, जवाफदेहिता र उत्तरदायित्वविहीन भएको आरोप लगाएका छन् ।

विराटनगरमा आइतबार आयोजित एक कार्यक्रममा बोल्दै उनले जनताले सुशासनको अनुभूति गर्न नसकेको र लोकतन्त्र स्वयं संकटमा परेको धारणा व्यक्त गरे । गुराँस पुस्तकालयले आयोजना गरेको ‘मुक्तिप्रसाद यदुनाथ चापागाईं सम्मान’ कार्यक्रममा सम्बोधन गर्दै कोइरालाले राज्यका तीनै अंग—कार्यपालिका, व्यवस्थापिका र न्यायपालिका—आफ्नो भूमिकामा असफल भइरहेकाले लोकतन्त्र कमजोर बनेको तर्क प्रस्तुत गरे ।

“न्यायालय ठिक ठाउँमा छैन, व्यवस्थापिका पनि छैन, कार्यपालिका झनै अव्यवस्थित छ,” कोइरालाले भने, “प्रधानमन्त्री वा मन्त्री फेरेर मात्रै देश अगाडि बढ्दैन । संरचनात्मक सुधार जरुरी छ ।”

मिलिजुली सरकारको अभ्यासमा सैद्धान्तिक विचलन
उनले नेपालको निर्वाचन प्रणालीले मिलिजुली सरकार निर्माणको बाध्यता सिर्जना गरेको स्वीकार गर्दै त्यसको नाममा राजनीतिक सिद्धान्त र मूल्यहरू गुमाउँदै जानु घातक हुने चेतावनी पनि दिए । “मिलिजुली सरकार अपरिहार्य हुन सक्छ, तर त्यसका नाममा पार्टीका आदर्श, विचार र पहिचानलाई नछाडौँ,” उनले भने, “यस्तो अभ्यासले कांग्रेसको आत्मा गुम्ने खतरा छ ।”

उनले दलहरूबीच सहकार्य आवश्यक भए पनि मूल्यहीन सम्झौता र स्वार्थका गठबन्धनले लोकतान्त्रिक व्यवस्थालाई अझ संकटमा पुर्‍याउने चेतावनी दिए ।

कार्यशैली परिवर्तनको माग
कोइरालाले सरकारलाई केवल आलोचना गर्ने मनसायले नभई सुधारको अपेक्षा गर्दै प्रश्न उठाएको प्रस्ट्याए । “जनताले परिवर्तनका लागि मत दिएका हुन्, निराशा र अनिश्चयका लागि होइन,” उनले भने, “तर आजको सत्ता संयन्त्र जनताको भावना प्रतिको जवाफदायी बनेको देखिँदैन ।”

उनका अनुसार सत्तामा पुग्ने दलले लोकतन्त्रका मूल्य र आचरणलाई आत्मसात् गर्नैपर्छ । जनतासँग गरेका वाचा भुलेर सत्ता टिकाउने खेलमा लाग्दा राजनीतिप्रति जनविश्वास खस्कने खतरा बढेको कोइरालाको भनाइ थियो ।

कांग्रेसभित्र आत्मपरीक्षणको संकेत
उनले आफ्नै पार्टी नेपाली कांग्रेसप्रति पनि आलोचनात्मक टिप्पणी गर्दै कांग्रेसले अब विचार र आचरणको पुनरावलोकन गर्नुपर्ने बेला आएको बताए । “हामी कुन कांग्रेस बनाउँदैछौं भन्ने प्रश्न आजका दिनमा हरेक कार्यकर्ताले गर्नुपर्छ,” उनले जोड दिए ।