सरकार बनाउने–भत्काउने खेलमा होमिनु हुँदैनः अध्यक्ष प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टीलाई सरकार निर्माण वा विघटनको समीकरणमा होइन, संगठन सुदृढीकरणमा केन्द्रित हुनुपर्ने सुझाव दिएका छन् ।

शुक्रबारदेखि सुरु भएको स्थायी कमिटी बैठकमा अध्यक्ष प्रचण्डले १० बुँदे राजनीतिक ब्रिफिङ प्रस्तुत गर्दै संगठन निर्माणलाई प्राथमिकतामा राख्नुपर्नेमा जोड दिएका हुन् । बैठकमा सहभागी पार्टी सचिव देवेन्द्र पौडेलका अनुसार प्रचण्डले पार्टीभित्रका आन्तरिक छलफलहरू सार्वजनिक नगर्न समेत आग्रह गरेका थिए ।

“उहाँले सरकार बनाउने वा भत्काउने विषयमा अहिलेको प्राथमिकता नभएको प्रस्ट पार्नुभयो,” पौडेलले भने, “पार्टीभित्रका कुरा बाहिर लैजानु हुँदैन भन्ने उहाँको स्पष्ट सन्देश छ ।”

प्रचण्डले पार्टीको स्थगित अभियान वर्षा सकिएपछि पुनः सञ्चालन गर्ने प्रस्ताव बैठकमा राखेका छन् ।

त्यसपछि केन्द्रीय कमिटी बैठक बोलाएर महाधिवेशनको मिति तय गरिने पौडेलले जानकारी दिए ।

माओवादी केन्द्रको स्थायी कमिटी बैठक तीन दिनसम्म चल्ने छ।