सिन्धुलीमा पहिरोसँगै सालको रुख ढलेर दुईको मृत्यु, तीन घाइते

सिन्धुली । अविरल वर्षापछि पहिरोसँगै सालको रुख ढलेर सिन्धुलीको हरिहरपुरगढी गाउँपालिका–१ बस्तीपुरमा दुई जनाको ज्यान गएको छ भने तीन जना घाइते भएका छन् ।

जिल्ला प्रहरी कार्यालयका प्रहरी नायब उपरीक्षक सूर्यप्रकाश सुवेदीका अनुसार आज दिउँसो आएको पहिरोले ओत लागेर बसेको टहरामाथि सालको ठूलो रुख खस्दा नौ वर्षीय सार्की थिङ र १६ वर्षीया शन्ता गोलेको घटनास्थलमै मृत्यु भएको हो ।

उक्त घटनामा १४ वर्षीया सिर्जना माया, १५ वर्षीया सन्ध्या भोलन र सात वर्षीय सुशील थिङ घाइते भएका छन् । उनीहरूको प्रारम्भिक उपचारपछि थप उपचारका लागि हेटौँडा अस्पताल पठाइएको प्रहरीले जानकारी दिएको छ ।

स्थानीयवासीका अनुसार वर्षासँगै जमिन चिप्लिएर रुख ढलेको हो ।