देशभर सोमबार साधारणतया बदली, केही स्थानमा भारी वर्षाको सम्भावना

काठमाडौं । हाल मनसुनको न्यून चापीय रेखा सरदर स्थानभन्दा दक्षिणतिर अवस्थित छ भने अरब सागरबाट जलवाष्पयुक्त हावाको प्रवाह पनि भइरहेको देखिएको छ । यसका कारण देशका विभिन्न भागहरूमा बदली र वर्षाको अवस्था देखिएको मौसम पूर्वानुमान महाशाखाले जनाएको छ ।

हाल मधेस प्रदेश, कर्णाली प्रदेश, सुदूरपश्चिम प्रदेशसहित बाँकी प्रदेशका पहाडी भू-भागहरूमा साधारणतया बदली रहेको छ भने अन्य भू-भागमा आंशिक बदली छ । कोशी, बागमती, गण्डकी र सुदूरपश्चिम प्रदेशका थोरै स्थानहरूमा मेघगर्जन र चट्याङसहित हल्कादेखि मध्यम वर्षा भइरहेको छ ।

सोमबारको मौसम पूर्वानुमान
सोमबार देशभर सामान्य बदली रहनेछ । कोशी, बागमती, लुम्बिनी र सुदूरपश्चिम प्रदेशका केही स्थानहरूमा तथा अन्य पहाडी र तराई भू(भागका थोरै स्थानहरूमा मध्यम वर्षाको सम्भावना रहेको छ । बागमती र सुदूरपश्चिम प्रदेशका एक-दुई स्थानमा भने भारी वर्षा हुने सम्भावना रहेको छ ।

आज रातिको अवस्था
आज राति पनि देशभर साधारणतया बदली रहनेछ । सुदूरपश्चिम प्रदेशका केही स्थानहरूमा, बागमती, गण्डकी र लुम्बिनी प्रदेशसहित अन्य प्रदेशका पहाडी भू-भागका थोरै स्थानहरूमा तथा बाँकी तराई क्षेत्रका एक-दुई स्थानहरूमा मध्यम वर्षाको सम्भावना रहेको छ ।

सावधानी अपनाउन मौसम विभागले सुझाव दिएको छ, विशेषगरी भारी वर्षा हुने स्थानहरूमा पहिरो, बाढी तथा डुबानको जोखिम रहन सक्छ ।