उपसभामुख इन्दिरा राना चीन भ्रमण सकेर स्वदेश फर्किइन्

काठमाडौं । प्रतिनिधि सभाका उपसभामुख इन्दिरा राना चीनको ६ दिने औपचारिक भ्रमण सकेर स्वदेश फर्किएकी छन् । साउन ६ गते प्रस्थान गरेकी राना आइतबार राति साढे ११ बजे त्रिभुवन अन्तर्राष्ट्रिय विमानस्थलमार्फत काठमाडौं आइपुगेकी हुन् ।

उपसभामुख रानाले साउन ७ देखि ११ गतेसम्म चीनको हेनान प्रान्तमा आयोजित सांघाई सहयोग संगठनअन्तर्गत सञ्चार, मिडिया तथा ‘थिङ्क ट्याङ्क’ सम्मेलनमा नेपालको तर्फबाट सहभागिता जनाएकी थिइन् ।

सम्मेलनको अवसरमा उनले ‘विकासका लागि शान्ति र स्थायित्व आवश्यकतामा नेपालको दृष्टिकोण’ विषयमा सम्बोधन दिँदै नेपालको नीति तथा अनुभव प्रस्तुत गरेकी थिइन् ।

यात्राका क्रममा उनले हेनान प्रान्तका सरकारी अधिकारीहरूसँग द्विपक्षीय भेटवार्ता गरेकी थिइन् भने झेङझोउ लगायतका विभिन्न सहर र स्थानहरूको अवलोकनसमेत गरेकी थिइन् ।