एनआरएनए यूकेको उपाध्यक्ष पदमा डा. रक्षा थापाको उम्मेदवारी, सुधारको एजेन्डासहित अभियानमा

लन्डन । बेलायतस्थित व्यवसायिक र सामाजिक क्षेत्रमा सक्रिय महिला उद्यमी डा. रक्षा थापाले गैरआवासीय नेपाली संघ (एनआरएनए) यूकेको आगामी निर्वाचनमा उपाध्यक्ष पदको लागि उम्मेदवारी घोषणा गरेकी छन् ।

लन्डनमा बिहीबार आयोजित एक भव्य कार्यक्रममार्फत उनले औपचारिक रूपमा स्वतन्त्र उम्मेदवारी घोषणा गर्दै एनआरएन अभियानलाई पारदर्शी, समावेशी र प्रभावकारी बनाउन ११ बुंदे कार्ययोजना सार्वजनिक गरिन् ।

‘संस्था बिग्रिएको छ भनेर छोड्नु हुँदैन, उपचार गर्नैपर्छ भनेर म अगाडि आएकी हुँ,’ उम्मेदवारी घोषणाको क्रममा उनले भनिन् ।

डा. थापा लन्डनस्थित सफल केयर कम्पनी माया सर्पोटेड लिभिङ की निर्देशक हुन् । व्यवसायसँगै सामाजिक संघसंस्थामा पनि उनले लामो समयदेखि नेतृत्वदायी भूमिका निर्वाह गर्दै आएकी छन् ।

सुधार, समावेशिता र सशक्तिकरणमा केन्द्रित प्रतिबद्धता
घोषणासभामा उनले प्रस्तुत गरेका प्रमुख प्रतिवद्धता निम्नानुसार छन्ः

• एनआरएन संस्थाको संरचना सुदृढीकरण र आन्तरिक एकता प्रवर्धन
• युवा नेतृत्व विकास र सशक्तिकरण
• गोर्खा आन्दोलनप्रति ऐक्यवद्धता र बेलायत-नेपाल सरकारसँग समन्वय
• नेपाली नागरिकताको निरन्तरता सुनिश्चित गर्न नीतिगत पहल
• महिलाको सामाजिक, सांस्कृतिक तथा आर्थिक सशक्तिकरण
• भाषा, संस्कृति र पहिचान संरक्षण
• संस्थागत पारदर्शिता र जवाफदेहिता
• विदेशमा रहेका नेपाली प्रतिभाको प्रतिनिधित्वका लागि बौद्धिक संजाल निर्माण

उनले भनिन्, ‘यो उम्मेदवारी केवल पदको लागि होइन, यो एक दृष्टिकोण हो— संस्थाभित्रै रहेर परिवर्तन सम्भव छ भन्ने विश्वासको घोषणा हो ।’

थापाको अभियानलाई सशक्त समर्थन
घोषणासभामा एनआरएनए यूकेसँग आवद्ध विभिन्न संघसंस्थाका अगुवाहरुले थापालाई समर्थन जनाए ।

उनका श्रीमान् तथा सामाजिक अभियन्ता राज पाण्डेले भने, ‘संस्थालाई गाली गरेर होइन, भित्रबाटै परिवर्तन सम्भव छ भन्ने सोच राखेर हामी अघि बढेका छौं ।’

पूर्व अध्यक्ष उमेशराज मोक्तानले डा. थापालाई खुलेर समर्थन गर्ने घोषणा गरे । उनले भने, ‘अब नेतृत्वमा महिलालाई मौका दिनुपर्छ ।’

यती नेपाली एसोसिएसनका वर्तमान अध्यक्ष टंक भट्टराईले भने, ‘अब एनआरएनएमा युवाको नेतृत्वको आवश्यकता छ र डा. थापाको विगतको यात्रा यसका लागि उपयुक्त उदाहरण हो ।’

आरजीएनएसका पूर्व अध्यक्ष पूण्य रेग्मीले थापाको हेटौंडाबाट यूकेसम्मको यात्रा उल्लेख गर्दै उनी युवापुस्ताको प्रेरणाको स्रोत भएको बताए ।

चुनौतीसँगै आशा
एनआरएनए यूके अहिले विश्वासको संकट, आन्तरिक कलह र नेतृत्वको अस्पष्टतामा रहेको धारणा सर्वत्र छ । सोसाइटी अफ नेपलिज प्रोफेसनल्स यूकेका अध्यक्ष गजेन कटुवालले भने, ‘संस्थाको साख जोगाउन र नयाँ आशा सिर्जना गर्न रक्षा थापाको उम्मेदवारीले सकारात्मक संकेत दिएको छ ।’

पूर्व अध्यक्ष विनोदविकास सिम्खडाले थापाको लिडरसीप क्वालिटी र दृष्टिकोणको प्रशंसा गर्दै नेतृत्वका लागि योग्य उम्मेदवार रहेको बताए ।

निर्वाचन मिति र प्रणाली
एनआरएनए यूकेको निर्वाचन आउँदो २६ जुलाईमा अनलाइन प्रणालीमार्फत हुने तय भएको छ ।

अब हेर्न बाँकी छ— डा. थापाको ‘उपचार’ अभियानले यूकेको एनआरएन संस्थालाई साँच्चिकै पुनःस्थापित गर्न सक्ला त ?