२६ दिनपछि सोनम वाङचुकले तोडे अनशन, हिंसा नगर्न सबैसँग अपिल

काठमाडौं । भारतका सामाजिक अभियन्ता सोनम वाङचुकले २६ दिन लामो आमरण अनशन अन्त्य गरेका छन् । उनले केन्द्रीय मन्त्री जे.पी. नड्डा, डा. जितेन्द्र सिंह तथा लेह–लद्दाख एपेक्स बडीका वरिष्ठ प्रतिनिधिहरूको उपस्थितिमा अनशन तोडेका हुन् ।

अनशन अन्त्य गरेको जानकारी वाङचुकले सामाजिक सञ्जाल एक्समार्फत सार्वजनिक गरेका छन् । उनका अनुसार सरकारसँग लामो छलफलपछि केही सर्तमा सहमति बनेको र देशमा सम्भावित हिंसात्मक अवस्था सिर्जना हुन सक्ने जोखिमलाई मध्यनजर गर्दै अनशन अन्त्य गर्ने निर्णय लिइएको हो ।

यसअघि विभिन्न राजनीतिक दलका ६५ जना सांसदहरूले संयुक्त रूपमा पत्र लेख्दै वाङचुकलाई अनशन समाप्त गर्न आग्रह गरेका थिए । त्यसपछि सरकार र आन्दोलनकारी पक्षबीच संवादको प्रक्रिया अघि बढेको थियो ।

वाङचुकले एक्समा लेखेका छन्, “सहमतिका सर्तबारे म छिट्टै छुट्टै भिडियोमार्फत विस्तृत जानकारी दिनेछु । त्यसबेलासम्म देशका सबै नागरिकलाई जहाँसुकै पनि हिंसा हुन नदिन र अत्यन्त संयमता अपनाउन आग्रह गर्दछु ।”

मेडिकल शिक्षासम्बन्धी नीट–यूजी प्रश्नपत्र चुहावट प्रकरणको विरोधमा विद्यार्थीहरू विगत एक महिनादेखि नयाँ दिल्लीको जन्तर–मन्तरमा आन्दोलनरत छन् । प्रदर्शनकारीहरूले केन्द्रीय शिक्षा मन्त्री धर्मेन्द्र प्रधानको राजीनामा माग गर्दै आन्दोलन जारी राखेका छन् ।

यही आन्दोलनप्रति ऐक्यबद्धता जनाउँदै सोनम वाङचुक २६ दिनदेखि आमरण अनशनमा बसेका थिए ।