नेपाल–चीन सम्बन्धलाई पुस्तौं पुस्तासम्म फैलाउनु आवश्यकः प्रधानमन्त्री ओली

काठमाडौं । प्रधानमन्त्री केपी शर्मा ओलीले नेपाल र चीनबीचको ऐतिहासिक मित्रतालाई भविष्यका पुस्तासम्म मजबुत बनाउँदै लैजानुपर्नेमा जोड दिएका छन् ।

‘नेपाल–चीन सांस्कृतिक शिखर सम्मेलन २०२५’ मा सम्बोधन गर्दै प्रधानमन्त्री ओलीले दुई देशबीचको सम्बन्धलाई अझ गहिरो, व्यापक र दिगो बनाउने दिशामा नेपाल सरकारले कुनै कमी नगर्ने स्पष्ट पारे ।

नेपाल–चीन कूटनीतिक सम्बन्ध स्थापनाको ७०औँ वार्षिकोत्सवको अवसरमा आयोजित उक्त कार्यक्रममा प्रधानमन्त्रीले भने, ‘नेपाल र चीनजस्ता पुराना सभ्यता भएका देशहरूबीचको सम्बन्ध केवल लेनदेनको होइन, भावनात्मक र सांस्कृतिक पक्षले पनि भरिएको हुन्छ । यस्ता कार्यक्रमले पुस्तौंदेखि पुस्तासम्म मित्रता गाढा बनाउन सहयोग गर्छन् ।’

उनले थपे, ‘दुई मुलुकबीचको मित्रता विस्तारका लागि गच्छे ठूलो कुरा होइन । सम्बन्ध आपसी समझदारी, सम्मान र साझा हितमा आधारित हुनुपर्छ । नेपाल सरकार त्यस दिशामा आवश्यक सबै पहल गर्न तत्पर छ ।’

कार्यक्रमको अवसरमा प्रधानमन्त्री ओलीले विभिन्न क्षेत्रमा योगदान पुर्‍याएका व्यक्तित्वहरूलाई सम्मानसमेत गरे । युवा सशक्तिकरण पुरस्कार काठमाडौँ महानगरकी उपप्रमुख सुनिता डङ्गोललाई, व्यवसाय नेतृत्व पुरस्कार राजेशकाजी श्रेष्ठ र वीरेन्द्रराज पाण्डेलाई, र शिक्षा उत्कृष्टता पुरस्कार अनुराधा शर्मालाई प्रदान गरिएको थियो ।