पेनाल्टीमा अस्ट्रेलियालाई हराउँदै इजिप्टले रच्यो इतिहास, पहिलोपटक अन्तिम १६ मा

काठमाडौं । फिफा विश्वकप २०२६ अन्तर्गत गएराति सम्पन्न रोमाञ्चक प्रतिस्पर्धामा अस्ट्रेलियामाथि पेनाल्टी सुटआउटमा ४–२ को जित निकाल्दै इजिप्टले पहिलोपटक विश्वकपको अन्तिम १६ मा स्थान सुरक्षित गरेको छ ।

अमेरिकाको टेक्ससस्थित डलास स्टेडियममा भएको खेल निर्धारित ९० मिनेट र अतिरिक्त समयसम्म १–१ को बराबरीमा टुंगिएपछि विजेताको छिनोफानो पेनाल्टी सुटआउटबाट गरिएको थियो । त्यसमा इजिप्टले उत्कृष्ट प्रदर्शन गर्दै ऐतिहासिक सफलता हात पार्यो ।

इजिप्टले खेलको १३औँ मिनेटमा इमाम आशौरको गोलमार्फत अग्रता लिएको थियो । तर ५५औँ मिनेटमा मोहम्मद हानीले हेडरबाट गरेको क्लियरेन्स आफ्नै पोस्टमा छिर्दा अस्ट्रेलियाले आत्मघाती गोलको लाभ उठाउँदै खेल १–१ को बराबरीमा ल्यायो ।

त्यसपछि दुवै टोलीले निर्धारित समय र अतिरिक्त समयमा थप गोल गर्न नसकेपछि खेल पेनाल्टी सुटआउटमा पुगेको थियो । सुटआउटमा इजिप्ट सफल रहँदा अस्ट्रेलियाका ह्यारी साउटर र लुकास हेरिङ्टनले मात्र गोल गर्न सके ।

यो नतिजासँगै विश्वकपमा चौथोपटक सहभागिता जनाएको इजिप्टले इतिहास रच्दै पहिलोपटक प्रतियोगिताको अन्तिम १६ (प्रि–क्वार्टरफाइनल) मा स्थान बनाउन सफल भएको छ ।