खतिवडाको भनाइः पार्टीले चाहे पद त्याग्न तयार छु

काठमाडौं । प्रतिनिधिसभा अन्तर्गतको राज्य व्यवस्था तथा सुशासन समितिका सभापति रामहरि खतिवडाले पार्टीको निर्देशन आए पदबाट राजीनामा दिन आफू तयार रहेको स्पष्ट पारेका छन् ।

शुक्रबार बसेको नेपाली कांग्रेसको केन्द्रीय कार्यसमिति बैठकमा उनले, पार्टीले आवश्यकता ठानेर बाहिरिन भने तत्काल पद त्याग्न आफूलाई आपत्ति नहुने बताए ।

‘पार्टीले अहिल्यै बाहिर बस भने म तयार छु,’ बैठकमा खतिवडाले बताएका थिए ।

संसदीय समितिबाट सर्वसम्मत पारित भएको ‘कुलिङ पिरियड’ व्यवस्था संशोधनको विषयमा उठेको विवादका कारण खतिवडा आलोचनामा परेका छन् । पार्टीभित्रैबाट आन्तरिक असन्तुष्टि बढिरहँदा सत्तारुढ नेकपा एमालेसहित विपक्षी दलहरूले समेत खतिवडालाई नैतिकताको आधारमा राजीनामा दिन सुझाव दिएका छन् ।

बैठकमा खतिवडाले पार्टीको एकतालाई जोड दिँदै व्यक्तिगतरुपमा दोषारोपणको प्रवृत्तिबाट कांग्रेस कमजोर हुने चेतावनी पनि दिए ।

‘पार्टी सबैको हो । कोही सभापतिलाई, कोही उपसभापतिलाई, कोही महामन्त्रीलाई वा केन्द्रीय सदस्यलाई दोष थोपर्ने हो भने पार्टी कहाँ पुग्ला ?’ उनले प्रश्न गरे, ‘त्यसैले हामी सबैले गम्भीर भएर भविष्यमा सुधार र परिष्कारतर्फ ध्यान दिनुपर्छ ।’