मनसुनी वायु कमजोर, केही स्थानमा भारी वर्षाको सम्भावना

काठमाडौं । हाल देशभर मनसुनी वायुको प्रभाव केही कमजोर देखिएको मौसम पूर्वानुमान महाशाखाले जनाएको छ । त्यससँगै स्थानीय वायुले आंशिक प्रभाव पारेको छ ।

यसको प्रभावस्वरूप कोशी प्रदेशलगायत देशका पहाडी भूभागहरूमा सामान्यतया बदली देखिएको छ भने अन्य भूभागहरूमा आंशिक बदली कायम छ । कोशी, बागमती, गण्डकी, लुम्बिनी र कर्णाली प्रदेशका एक–दुई स्थानमा मध्यम वर्षा भइरहेको छ ।

दिउँसोको पूर्वानुमान
आज दिउँसो कोशी प्रदेश लगायतका पहाडी भूभागमा सामान्यतया बदली रहनेछ । लुम्बिनी, बागमती, गण्डकी र कोशी प्रदेशका पहाडी भेगका थोरै स्थानहरूमा तथा मधेस प्रदेशसहित केही तराई भूभागहरूमा मध्यम वर्षा हुन सक्ने सम्भावना छ ।

विशेषगरी कोशी र बागमती प्रदेशका पहाडी क्षेत्रका एक–दुई स्थानमा भारी वर्षा हुने सम्भावना रहेकाले सतर्कता अपनाउन मौसम पूर्वानुमान महाशाखाले आग्रह गरेको छ ।

रातिको समयमा देशको पहाडी भेगमा सामान्यतया बदली रहनेछ भने बाँकी भागहरूमा आंशिक बदली रहने सम्भावना छ । लुम्बिनी र सुदूरपश्चिम प्रदेशसहित देशका पहाडी भेगका केही स्थानहरूमा तथा अन्य तराई भूभागका एक–दुई स्थानमा मध्यम वर्षा हुन सक्ने जनाइएको छ ।

कोशी र बागमती प्रदेशको पहाडी भूभागमा भारी वर्षा हुन सक्ने भएकाले त्यहाँका बासिन्दाहरूलाई आवश्यक सतर्कता अपनाउन महाशाखाले पुनः अनुरोध गरेको छ ।